د دید خبري آژانس د خبر له مخې، د افغانستان په اړه د ملګرو ملتونو په کوربه توب د دوحې له غونډې مخکې د افغانستان لپاره د هېوادونو د ځانګړيو استازو ډیپلوماټیکې مشورې دوام لري.
د افغانستان لپاره د هېوادونو د ځانګړيو استازو دوهمه غونډه به نن یکشنبه (د ډلو ۲۹مه) د ملګرو ملتونو د سرمنشي په کوربه توب پر ځايي وخت د ماښام په ۶ بجو پیل شي.
د نړۍ د څه باندې ۲۰ هېوادونو استازي دا مهال د طا-لبانو تر واک لاندې افغانستان په اړه پر خپلو دریځونو خبرې کوي.
تمه ده چې انتونیو ګوتریش به له افغانستان سره د اړیکو د عادي کولو لپاره د هېوادونو د ګډ دریځ غوښتنه وکړي. د خبرو اترو اصلي برخه به سبا دوشنبه په دوحه کې ترسره شي.
دا په داسې حال کې ده، چې دې غونډې ته د طا-لبانو مخالفو سیاسي جریانونو ته بلنه نه ده ورکړل شوې او سرپرست حکومت هم په کې له ګډون ډډه کړې ده.
