ډید خبري اژانس: د ملګرو ملتونو د خوړو نړیوال پروګرام اعلان کړی چې سږ کال یې افغانستان ته د بشري مرستو ۱۵۰۰ الوتنې کړې دي.
د خوړو نړیوال پروګرام د یکشنبې په ورځ (د سرطان په ۱۸ مه) اعلان وکړ چې د ملګرو ملتونو د بشري مرستو د ادارې (UNHAS) سږ کال افغانستان ته ۱۵۰۰ الوتنې کړي دي.
دې ادارې دا هم ویلي چې په الوتنو کې ۸۵۰۰ مسافر او ۱۹ ټنه بشري کارګو لېږدول شوي دي.
د خوړو نړیوال پروګرام زیاته کړه، چې په دې لېږد کې طبي وسایل، درمل او واکسینونه شامل وو.
دا په داسې حال کې ده، چې تر دې وړاندې د خوړو نړیوال پروګرام په افغانستان کې د بشري وضعیت د خرابوالي او د بودیجې د کموالي خبره کړې وه.
دغه سازمان وايي چې دا اوس کولی شي یوازې د ۱۵ ملیون اړو خلکو څخه پنځه ملیونه مرسته وکړي.
د خوړو نړیوال پروګرام اعلان کړی چې په راتلونکي ژمي کې د افغانستان له خلکو سره د مرستې لپاره یو میلیارد ډالرو بودجې ته اړتیا لري.
