د جرمني د بهرنیو چارو له وزیر سره د کرزي د خبرو تمرکز د افغانستان پر وضعیت دی
دید خبري آژانس: د هېواد پخواني ولسمشر حامد کرزي د جرمني د بهرنیو چارو له وزیر سره د افغانستان د وضعیت او بین الافغاني خبرو په اړه سلامشورې کړې دي.
د هېواد پخواني ولسمشر حامد کرزي د جرمني د بهرنیو چارو له وزیرې انالنا بائربوک سره د ویډیو کنفرانس له لارې د هېواد پر روانو حالاتو او نورو مسایلو خبرې وکړې.
کرزي په ټویټر پاڼه لیکلي چې په دغه ویډیويي کنفرانس کې پخواني ولسمشر له افغانستان سره په تېرو دوو کلونو کې د جرمني د مرستو د ستاینې ترڅنګ له افغانانو سره د دغه هېواد د بشري مرستو د دوام غوښتنه وکړه.
کرزي د نجونو د زده کړې او کار ته د ښځو د راستنېدو په برخه کې د مېرمن بائربوک هڅې وستایلې او د نجونو زده کړه یې د هېواد د روښانه او هوسا راتلونکې لپاره مهمه وبلله.
په دغه ویډیو کنفرانس کې په افغانستان کې د سولې او ثبات د تامین لپاره د لارو چارو په ځانګړي ډول د بین الافغاني خبرو د اهمیت په اړه هم نظرونه تبادله شول.
