ډید خبري اژانس: د تاجیکستان ولسمشر د افغانستان او فلسطین د روانو حالاتو په اړه ژوره اندېښنه څرګنده کړې ده.
امام علي رحمان له نړيوالې ټولنې وغوښتل چې په هېوادونو کې شته شخړې د خبرو اترو له لارې حل کړي.
امام علي رحمان په دې وروستیو کې د تاجیکستان په ولسي جرګه کې د خپل هېواد د کورني او بهرني سیاست په اړه وینا وکړه او د دې وینا د متن یوه کاپي د تاجکستان د ولسمشرۍ په ویب پاڼه کې خپره شوه.
ښاغلي رحمان په خپلو خبرو کې د نور وضاحت له ورکولو پرته د افغانستان پر روان وضعیت اندېښنه وښوده.
نوموړي په تېرو دوو کلونو کې په پرله پسې ډول په سیمه ییزو او نړیوالو غونډو کې ټینګار کړی چې په افغانستان کې باید د ټولو توکمونو په ګډون یو دیموکراتیک او ټول شموله حکومت جوړ شي.
د وسلو، نشه یي توکو قاچاق او له افغانستان څخه تاجیکستان او منځنۍ اسیا ته د افراطیانو د نفوذ هڅې د دوشنبې نورې اندیښنې دي.
امام علي رحمان ټینګار وکړ، تاجکستان د ملګرو ملتونو، د ګډو ګټو خپلواکو هېوادونو، د شانګهای د همکارۍ سازمان، د اسلامي همکاریو سازمان، د اقتصادي همکاریو سازمان، د امنیت د ګډو تړونونو سازمان، د امنیت د سازمان په ګډون له ټولو نړیوالو او سیمه ییزو سازمانونو سره همکاري کوي. او په اروپا کې همکاري، او نور بنسټونه د همکارۍ مسلو حل کوي.
نوموړي د خپل پيغام په يوه بله برخه کې ويلي، چې تاجکستان غواړي په نږدې راتلونکي کې يو شمېر نړيوالې او سيمه ييزې ترانزيټي پروژې عملي کړي.
د امام علي رحمان په وينا، له دغو پروژو څخه يوه هم د چين-تاجیکستان-افغانستان ترانزيټي اقتصادي دهلېز دى، چې په نږدې راتلونکي کې به ګټې اخيستنې ته وسپارل شي.
