د بښنې نړیوال سازمان پاکستان ته پرانیستی لیک: د افغان کډوالو د جبري اخراج پرېکړه دې لغوه کړي
د دید خبري آژانس د خبر له مخې، د بښنې نړیوال سازمان لوړ پوړو چارواکو د پاکستان د موقت حکومت لومړي وزیر ته په یوه پرانیستي لیک کې له دغه هېواده د افغان کډوالو د جبري ایستلو د پرېکړې د لغوه کېدو غوښتنه کړې ده.
د بخښنې نړیوال سازمان په دې وروستیو کې په خپله ایکس پاڼه کې لیکلي چې د دې سازمان لوړپوړي چارواکي د پاکستان لومړي وزیر انوارالحق کاکړ ته په یوه پرانیستي لیک کې د نومبر په لومړۍ نیټه د غیر راجستر افغان مهاجرینو د جبري ایستلو د حکومت د پریکړې د لغوه کیدو غوښتنه کړې ده.
د بښنې نړیوال سازمان په دې اړه لیکلي: پاکستان له تېرو ۳۰ کلونو راهیسې په نړۍ کې د افغان کډوالو تر ټولو لوی کوربه هېواد دی او د بښنې نړیوال سازمان له حکومته غوښتي چې د بشري حقونو له نړیوالو قوانینو سره سم د افغان کډوالو کوربه توب ته دوام ورکړي.
دا لیک په داسې حال کې لیکل شوی چې له پاکستانه د ناقانونه کډوالو د وتلو مهلت په دوو ورځو کې پای ته رسېږي او پاکستاني چارواکو په وار وار اعلان کړی چې له خپلې پرېکړې به بېرته نه وځي.
