د بشري حقونو په شورا کې د قطر د استازي په افغانستان کې پر داخلي تړون ټینګار
د ډید خبري اژانس: د ملګرو ملتونو د بشري حقونو په شورا کې د قطر استازی وايي چې په افغانستان کې باید داخلي توافق او ملي پخلاینه وشي.
د قطر استازي جویرة السویدي د ملګرو ملتونو د بشري حقونو د شورا په غونډه کې په افغانستان کې پر داخلي تړون ټینګار وکړ.
قطري سرچینو د یکشنبې په ورځ (د سرطان ۱۲مه) د نوموړي له قوله خبر ورکړ چې نوموړي د نجونو د زده کړو په برخه کې د طا-لبانو کړنې منفي بللې او د نجونو د تعلیم پر اهمیت یې ټینګار کړی دی.
هغه دا هم وويل، چې د نجونو د ښوونځيو تړل کېدل پر بشري حقونو، پرمختګ او د افغانستان پر اقتصاد منفي اغېز کوي.
هغه په ډاګه کړې، چې د افغانستان پرمختګ د ټولنې پر ټولو برخو په ځانګړې توګه پر ښځو، نجونو او ماشومانو د شته ناورین د بشردوستانه اغېزو د کمولو لپاره د اغېزناکو او بیړنیو اقداماتو ترسره کولو ته اړتیا لري.
دا څرګندونې په داسې حال کې کېږي چې طا-لبانو له یوې خوا تر شپږم ټولګي پورې د نجونو پر زده کړو بندیز لګولی او له بلې خوا په افغانستان کې دننه په څو جبهو کې په جګړه بوخت دي.
