د ا.ا کابینه: د بې کيفيته تېلو د واردولو مخنيوي په اړه اقدامات کېږي
دید خبرې آژانس: د اسلامي امارت د رئیس الوزراء ملا محمد حسن اخند په مشرۍ، د کابینې نوبتي غونډه ترسره شوې او په کې پر یو لړ موضوعاتو بحث او پرېکړې شوې دي.
د چارو ادارې لوی ریاست په خپره شوې خبرپاڼه کې راغلي چې د کابینې په ۱۸مه غونډه کې د هېواد پر مهمو اقتصادي، ټولنيزو او فرهنګي مسایلو بحثونه او پرېکړې وشوې.
په غونډه کې همدا رنګه ځینې مسایل ځانګړيو پلاويو ته سپارل شوي، څو یې چارې نهایي او راپور يې د کابینې بلې غونډې ته وړاندې کړي.
د کابینې په یاده غونډه کې دغه راز، هېواد ته د بې کيفيته تېلو واردولو د مخنيوي په اړه د فرمانونو او حکمونو د تعقیب او نظارت لوی ریاست سرپرست مولوي شمس الدین شریعتي په مشرۍ د ټاکل شوي پلاوي وړانديزونه تائيد شوي او اړوندو ادارو ته دنده سپارل شوې چې د تطبیق په موخه یې اقدامات ترسره کړي.
ورته مهال، ټولو اداراو ته دنده سپارل شوې چې په لویو او وړو پروژو کې د خلکو د استخدام په اړه له کار او ټولنیزو چارو وزارت سره همغږي وکړي او هڅه دې وشي چې د بشري ځواک د استخدام په برخه کې دې په کور دننه خپلو خلکو ته لومړیتوب ورکړل شي.
د غونډې په پای کې، پر يو شمېر نور موضوعاتو هم بحث شوی او په اړه يې لازم تصميمونه نيول شوي دي.
