دید خبرې آژانس: د ملي دفاع او کورنیو چارو وزارتونو سرپرستانو او د استخباراتو رييس خپل امنیتي راپور د اسلامي امارت مشر ته وړاندې کړ.
په کندهار کې د دفاع او کونیو چارو وزارتونو او د استخباراتو د عمومي ریاست د امنیتي راپور وړاندې کېدل.
د اسلامي امارت ویاند ذبیح الله مجاهد وایي، مولوي محمد یعقوب مجاهد، خلیفه سراج الدین حقاني او عبدالحق وثیق، د دفاع او کورنیو چارو وزارتونو له معینانو سره یوځای په کندهار ولایت کې د اسلامي امارت مشر ته د هېواد امنیتي راپور وړاندې کړ.
د مجاهد په وینا، په دې غونډه کې د امنیتي بنسټونو وړاندیزونه وڅېړل شول او د دغو بنسټونو د نظم، تجهیز او د وړتیا لوړولو لپاره لازمې پرېکړې وشوې.
د اسلامي امارت د ویاند مرستیال، حمدالله فطرت وايي: په دې ناسته کې د یادو امنیتي ارګانونو وړاندیزونه واورېدل شول او هغوی ته په اجراتو او کاري ثباتونو کې اړینې لارښوونې ورکړل شوې. همدارنګه، د دغو ادارو د نظم ښه کولو، تجهیز او ظرفیت لوړولو لپاره مهمې پرېکړې وشوې.”
عبدالصادق حمیدزوی چې د سیاسي چارو یو بل کارپوه دی، وايي : “د امنیت د تأمین لپاره، هغه څه چې مهم دي، معلومات دي او د معلوماتو د تبادلې لپاره همغږي اړینه ده. لکه څنګه چې د ادارو او اجرائیه قواو ترمنځ همغږي شته، یو ښه امنیت تأمین او تضمین کېږي. دغه ناستې چې راپورونه یې وړاندې کېږي یا حکمونه ورکول کېږي، اطاعت او پاملرنه زیاتوي.”
دا په داسې حال کې ده چې دوه اوونۍ وړاندې د کندهار ولایت مقام په یوه خبرپاڼه کې ویلي و، چې د دفاع وزارت د سرپرست په مشرۍ په کندهار کې د تصیفې کمېسیون غونډه جوړه شوه چې په دې غونډه کې د کورنیو چارو وزارت امنیتي مرستیال، د کندهار والي، د اسلامي امارت د مشر د دفتر استازي او د کندهار پوځي او ملکي چارواکو حضور درلود، خو د کورنیو چارو وزارت سرپرست په دې غونډه کې ګډون نه وکړی.
