د امریکا د کډوالۍ سیاستونو ته غبرګونونه
دید خبرې آژانس: امریکا ته د افغان کډوالو د لېږد د ملاتړ سازمان رییس شان وانډایور وايي، چې له امریکايي ځواکونو سره د همکارو افغانانو د لېږد په هکله د امریکا د بهرنیو چارو وزارت وروستیو څرګندونې، ناروښانه دي.
امریکا ته د افغانانو د لېږد د ملاتړ سازمان رییس زیاتوي، د بهرنیو چارو وزارت باید روښانه کړي، چې ایا په افغانستان کې د امریکايي ځواکونو پخواني همکاران امریکا ته د افغانستان او څو نورو هېوادونو د وګړو د سفر د بندیز په لېست کې شامل دي او که نه؟.
ښاغلی وانډایور وايي:«موږ په کلکه سپارښتنه کوو، چې تاسو دا مسئله د مطلق حقیقت په توګه مهګڼئ. موږ پوهېږو چې له ۴۱ تر ۴۳ پورې هېوادونو لیست شته چې وګړي یې ښايي امریکا ته د ننوتلو اجازه ونهلري، حتی که دوی د امریکا معتبرې ویزې یا احتمالي ګرین کارټ هم ولري.»
ورته مهال، د امریکا د مشرانو جرګې د بهرنیو اړیکو د کمېټې لوړپوړي غړي د امریکا بهرنیو چارو وزیر ته په یو لیک کې د مېشتېدنې د هڅو ځنډېدو په تړاو د ډانلډ ټرمپ د اجرایوي فرمان په اړه د اندېښنې په څرګندولو سره ویلي، چې امریکا باید خپلو «افغان متحدینو» ته ژمنه پاتې شي.
د امریکا د مشرانو جرګې د بهرنیو اړیکو د کمېټې لوړپوړې غړې جین شاهین وايي:«په دغه لیک کې چې د مشرانو جرګې د بهرنیو اړیکو د کمېټې له خوا خپور شوی راغلي: زه په درنښت له تاسو غوښتنه کوم، چې د اوږدې مودې لپاره د دغو کسانو ملاتړ ته دوام ورکړئ او د هغو محدودیتونو د لرې کولو لپاره اړین اقدامات وکړئ، چې امریکا ته د افغان SIV غوښتونکو او لرونکو د سفر مخه نیسي، امریکا ته دننه کېدل نه یوازې یو اخلاقي مسوولیت دی؛ بلکې د ملي امنیت یو لومړیتوب دی چې موږ په سختو شېبو کې پر خپلو ژمنو ودرېږو.»
د کډوالو د حقونو فعال علي رضا کریمي څرګندوي:«د دې کسانو د منلو ځنډ نه یوازې د هغوی ژوند په خطر کې اچوي؛ بلکه د امریکا اخلاقي اعتبار او ژمنې هم تر پوښتنې لاندې راولي. واشنګټن باید هر څومره ژر چې شونې وي، د دغو کډوالو د لېږد لړۍ چټکه کړي؛ ځکه چې د دې پروسې دوام به جدي بشري عواقب ولري او پراخه ډیپلوماټیک بحران به رامنځته کړي.»
ورته مهال، د امریکا د کډوالۍ ځينې دوسیه لرونکي هم د خپل راتلونکي په اړه اندېښمن دي.
د امریکا د کډوالۍ دوسیه لرونکی ایمل حبیبي «هغه افغانان چې په پاکستان کې ژوند کوي، له یوه نامعلوم برخلیک سره مخ دي. د پاکستان حکومت هم فشارونه زیات کړي دي او موږ غواړو، هغه افغانان چې په تمه دي کهچېرې تر یوه یا دو میاشتو یې کارونه بشپړ نهشي، افغانستان ته اړول کېږي.»
د امریکا د کډوالۍ دوسیه لرونکی حمید پیکار په دې هکله وویل:«موږ له متحده ایالاتو په صمیمانه توګه غوښتنه کوو، چې تر ټولو ژر دغه لړۍ پیل کړي او ژر تر ژره هغه کسان چې په البانیا، قطر او پاکستان کې شتون لري، د دوی دوسیو ته رسېدنه وکړي.»
د امریکا د بهرنیو چارو وزارت ویاندې د دوشنبې په ورځ په یوه خبري غونډه کې اعلان وکړ چې امریکا ته د ځینو هېوادونو د وګړو د سفر د بندیز لېست نشته.
نوموړې دغه راز ټینګار وکړ چې د تېر حکومت په څېر د ټرمپ اداره هم د امریکا د پوځ او حکومت د پخوانیو افغان همکارانو لېږد او مېشتېدو ته ژمنه ده.
