د امریکايي ادارې اعتراف: په افغانستان کې مو ډېرې پیسې له لاسه ورکړې او فساد مو غوړولی دی
ډید خبري اژانس: د افغانستان د بیارغونې لپاره د امریکا ځانګړي مفتش افغانستان ته د زیاتو پیسو انتقال ته په اشارې سره اعتراف وکړ چې امریکا په دغه هیواد کې له فساد سره مرسته کړې ده.
د افغانستان د بیارغونې لپاره د امریکا ځانګړي مفتش جان ساپکو له دغه هېواد څخه افغانستان ته د «سترو» پیسو انتقال ته په اشارې سره ویلي چې امریکا په افغانستان کې په فساد کې ونډه لري.
نوموړي دغه څرګندونې پرون د بریتانیا د شاهي یونایټیډ خدماتو په انستیتوت کې وکړې.
ساپکو په افغانستان کې اداري فساد د امریکا د ماموریت تر ټولو لوی ننګونه وبلله او ویې ویل: موږ نه یوازې ډېرې پیسې له لاسه ورکړې، بلکې فساد ته مو هم ډېره ونډه ورکړې ده.
هغه د افغانستان په اړه د امریکا چلند «غیر واقع بینانه» وباله او زیاته یې کړه: افغانستان یو بې وزله هېواد دی چې ناڅاپه د زیاتو پیسو سیلاب راغی او لږې څارنې ته اړتیا وه.
د افغانستان د بیارغونې لپاره د امریکا ځانګړي مفتش په دوام وویل: موږ په افغانستان کې له پنځوسو څخه زیات هیوادونه او نړیوال سازمانونه فعالیت درلود، خو د امریکا او نورو هیوادونو ترمنځ همغږي ډیره ستونزمنه وه.
هغه په افغانستان کې د یو بل د فعالیتونو په اړه د دولتونو او نړیوالو بنسټونو ناپوهي یوه جدي ننګونه وبلله او ویې ویل: موږ او زموږ متحدین نه پوهیږو چې دوی څه کوي او قراردادیان یې څوک دي.
تر دې مخکې د افغانستان د بیارغونې لپاره د امریکا ځانګړي مفتش ویلي وو چې له افغانستان سره د امریکا د ټولو مرستو څه باندې ۱۵،۵ میلیارده ډالره ضایع شوي دي.
هغه دا هم وویل چې په دوو لسیزو کې امریکايي مالیه ورکوونکو د افغانستان د بیارغونې لپاره ۱۴۷ میلیارده ډالر ورکړي دي.
