د افغان ښځو حقوق له امریکا سره هیڅ تړاو نه لري – واشنګټن ته د مجاهد ځواب
ډید خبري اژانس: د افغان ښځو د حقونو په اړه د امریکا د بهرنیو چارو د وزیر انتوني بلینکن د څرګندونو په غبرګون کې د سرپرست حکومت ویاند وايي، دا موضوع له امریکا سره هېڅ تړاو نه لري.
انتوني بلنکن د سه شنبې په ورځ د طا-لبانو له خوا پر ښځو پر محدودیتونو نیوکه وکړه او ویې ویل چې د افغانستان خلک د طا-لبانو د دې پالیسۍ خلاف دي.
ذبیح الله مجاهد ملي راډیو ته وویل چې امریکا باید د غزې د جګړې په اړه خپل مسوولیت درک کړي. هغه زیاته کړه چې امریکا په غزه کې د اسراییلو او اسراییلو د «جرم» په ملاتړ سره دا وښوده چې «نه بشري حقونه پیژني او نه د ښځو او ماشومانو حقونه».
ذبیح الله مجاهد امریکا د فلسطینیانو په وژنه تورنه کړه. د طا-لبانو ویاند ویلي: «دا د امریکا اصلي څېره ده».
د امريکا د بهرنيو چارو وزير په واشنګټن کې د «افغان ښځو د اقتصادي پياوړتيا نوښت» په غونډه کې د افغان ښځو پر وړاندې د طا-لبانو پر ځپلو سياستونو نيوکه وکړه او ويې ويل چې د افغانستان ٨٥ سلنه خلک د طا-لبانو له دغو بنديزونو سره مخالف دي.
انتوني بلینکن زیاته کړه چې طا-لبان د افغانستان له اقتصاد څخه د ښځو په ایستلو سره هیواد ته زیان رسوي. هغه د طا-لبانو دغه کړنه د افغانستان د دوامدار پرمختګ پر وړاندې خنډ وباله.
