د افغانستان په چارو کې د پاکستان او ازبکستان د ځانګړي استازي په غونډه کې د همکاریو پر پراختیا ټینګار
ډيډ خبري اژانس: د افغانستان په چارو کې د پاکستان ځانګړي استازي له ازبکستاني چارواکو سره د افغانستان پر وضعيت او دوه اړخيزو همکاريو خبرې وکړې.
د افغانستان لپاره د ازبکستان ځانګړي استازي عصمت الله ایرگشوف پرون د افغانستان لپاره د پاکستان له ځانګړي استازي اصف دراني سره وکتل.
دواړو لورو د افغانستان په روان وضعیت او د افغانستان په لور د همکاریو د پراخولو لپاره د نړیوالې ټولنې او دواړو هېوادونو د هڅو په اړه د نظر تبادله وکړه.
دوی همدا راز په افغانستان کې د ترانسپورتي او ارتباطي پروژو په ځانګړي ډول د ترمذ-مزار شریف-کابل-پیښور د اورګاډي د کرښې د جوړولو په اړه هم سلا مشورې وکړې چې د پاکستاني لوري په وینا د سیمه ییز اتصال د مفکورې په پلي کولو کې بنسټیز اهمیت لري.
دواړو خواوو په افغانستان کې د بشري ناورین د حل او د دغه هېواد د سوله ییز پرمختګ د هڅولو لپاره د ګډو اقداماتو په رامنځته کولو کې هم خپل منځي لېوالتیا څرګنده کړه.
د ازبکستان جمهوریت د بهرنیو چارو وزارت لومړي مرستیال له اصف دراني سره د سوداګرۍ، اقتصاد، پانګونې، ټرانسپورټ او ارتباطاتو په برخو کې د ازبکستان او پاکستان ترمنځ د ستراتیژیکو همکاریو د لا پراختیا په اړه هم خبرې وکړې.
د افغانستان په لور په ځانګړې توګه د افغانستان خلکو ته د بشري مرستو او نورو مرستو د رسولو په برخه کې د همکاریو د پراختیا اهمیت هم د بحث د یوې موضوع په توګه ولوستل شو.
دواړو خواوو د سیمه ییزو او نړیوالو سازمانونو په چوکاټ کې د دواړو هېوادونو ترمنځ د همکارۍ په اړه هم خبرې وکړې.
