د دید خبري آژانس: د قطر د بهرنیو چارو وزیر مسکو ته د خپل سفر په ترڅ کې د دغه هېواد له چارواکو سره د افغانستان په اړه سلا مشورې کړې او د قطر د امیر لیک یې پوتین ته سپارلی دی.
د روسيې د بهرنيو چارو وزير سرګي لاوروف او د قطر لومړي وزير او د بهرنيو چارو وزير محمد بن عبدالرحمن بن جاسم ال ثاني د افغانستان، سوريې، ليبيا، سوډان او فلسطين پر وضعيت تمرکز درلود او پر نړيوالو مسايلو يې خبرې وکړې.
د روسیې د بهرنیو چارو وزارت په یوې بیانیې کښې اعلان وکړ: د افغانستان، سوریې، لیبیا، سوډان او د فلسطین د سیمو د حالاتو په هکله د نړیوالې او سیمه ایزې اجماع په هکله هم جدی پاملرنه شوې ده.
د بیانیه په دوام کې راغلي: په دې خبرو کې د روسیې او قطر ترمنځ د څو اړخیزو اړیکو د لا پیاوړتیا په اړه مفصلې خبرې وشوې. د سیاسي ډیالوګ د ټینګولو او د متخصصو اقتصادي او پانګوالو ادارو له لارې د اړیکو د رامنځته کولو پر متقابل هوډ ټینګار شوی دی.
د غونډې په پای کې لاوروف په روسیه کې د قطر سفیر احمد بن ناصر بن جاسم الثاني ته د روسیې او قطر د اړیکو په پیاوړتیا کې د ګډون له امله د دوستۍ جایزه ورکړه.
د قطر د بهرنیو چارو وزیر د روسیې له ولسمشر ولادیمیر پوتین سره د کتنې پر مهال د قطر د امیر یو لیک هم استولی دی.
په دې لیک کې د دوه اړخیزو اړیکو، د انرژۍ په برخو کې ګډې ګټې، د خوړو خوندیتوب او د نړیوالې سولې او امنیت اړوند موضوعات شامل دي.
باید وویل شي، چې الثاني تېره اوونۍ مسکو ته سفر کړی و.
