ډيډ خبري اژانس: د افغانستان لپاره د ایران ځانګړی استازی او سفیر د افغانستان په اړه د خبرو لپاره د یکشنبې په ورځ له خپل یوه ملګري پلاوي سره اسلام اباد ته ورسېد.
په دې سفر کې به ایراني او پاکستاني چارواکي د افغانستان پر وضعیت خبرې وکړي.
حسن کاظمي قمي د افغانستان په چارو کې د پاکستان د لومړي وزیر د ځانګړي استازي اصف علي دراني په بلنه اسلام اباد ته تللی دی.
ویل کېږي چې کاظمي قمي به له خپل پاکستاني سیال، د پاکستان د بهرنیو چارو له وزیر او د دغه هېواد له یو شمېر نورو چارواکو سره وګوري.
په همدې حال کې د ایران د بهرنیو چارو وزارت په دې وروستیو کې د یوې اعلامیې په خپرولو سره د افغانستان په اړه د تهران نظر او د اوسني کړکېچ د هواري لپاره د دغه هېواد د ګاونډیانو ترمنځ د همغږۍ د رامنځته کولو پر پلان ټینګار کړی دی.
د ایران د بهرنیو چارو وزارت د تماس ډلې پر جوړولو ټینګار کړی او د افغانستان لپاره یې د سیمې د هېوادونو ترمنځ همغږي اړینه بللې ده.
