د افغانستان د اماني صندوق درې سوه میلیونه ډالره ګټه کړې دی
دید خبرې آژانس: شاه محمد محرابی د افغانستان د اماني صندوق یوه غړي وایي چې دغه صندوق تر اوسه څه باندې ۳۰۰ میلیونه ډالره ګټه کړې.
شاه محمد محرابي د دغه صندوق د جوړولو موخه د ۳.۸ میلیارد ډالرو ساتنه او پالنه ګڼي.
هغه طلوع نیوز ته ویلي، د افغانستان اماني صندوق د ۱۴۰۱ لمریز کال د وږي پر ۲۴مه سویس کې د درې اعشاریه پنځه میلیارده ډالرو شتمنیو د ساتلو په موخه جوړ شو.
د افغانستان د اماني صندوق د مدیره پلاوي غړي، شاه محمد محرابي و ویل: « د افغانستان اماني صندوق د امانتدار او لارښوونکي په توګه، زما رول دا دی چې د دغو پېسو د هرډول ګټې په ګډون چې کوي یې، د هغو ساتنه وکړم او دا ډاډ تر لاسه کړم چې د مالي ثبات د ساتلو له اصلي موخو سره سمې کارول کیږي.»
د ۲۰۲۱ کال په اګست کې په هېواد کې له سیاسي بدلونونو وروسته د امریکا او اروپا په بانکونو کې د هېواد څه باندې نهه میلیارده ډالره شتمنۍ کنګل شوې دي.
