دید خبرې آژانس: د افغانستان بانک لومړي مرستیال صدیق الله خالد او د مالیې وزارت مالي معين عبدالقدير احمد، نن د اداینيزو/تادیاتي سیسټمونو د نښلولو هوکړه لیک په کابل کې لاسلیک کړ.
په همدې مناسبت جوړه شوې غونډه کې د افغانستان بانک لومړي مرسیتال صدیق الله خالد، وویل: “نن موږ د افغانستان بانک او د مالیې وزارت ترمنځ د یوه مهم هوکړه لیک د لاسلیک شاهدان یوو چې د افغانستان اسلامي امارت د رهبرۍ د سپارښتنو او احکامو په رڼا کې د عوایدو د شفاف راټولولو، امارتي لګښتونو او معاشونو د الکترونیکي تادیاتو لپاره مهم بنسټیز ګام بلل کېږي.
دا هوکړه د هېواد د مالي سکټور د پرمختګ، روڼتیا، حساب ورکونې او د امارتي مالي پروسو د معياري کولو لپاره يو ستر تحول دی.”
خالد زیاته کړه چې د برېښنايي تادیاتو سیسټم په پلې کېدو سره به ټول اجراات په نړیوالو معیارونو برابر ترسره شي او د عوایدو، لګښتونو او د معاش اجرايي بهیر به معیاري او منظم شي.
همدا رنګه د نغدو پیسو فزیکي راکړه ورکړه به محدوده او د پیسو د ژر زړېدا، لېږد او له احتمالي خطر څخه به مخنیوی وشي.
د هغه په وینا، د يادو احکامو له مخې، ټولې امارتي عايداتي ادارې مکلفې دي چې خپل عواید د بانک له لارې راټول کړي، له خپلسري لګښت څخه ډډه وکړي او په مالي اجرااتو کې د روڼتیا اصل رعایت کړي.
دغه راز، د مالیې وزارت د عوایدو لوی رئیس مولوي شاه حسین حسیني وویل: “دا چې اوسمهال ټول وزارتونه او امارتي ادارې په مرکز او ولايتونو کې ملي عوايد د بانک له لارې او ځیني یې په فزيکي بڼه راټولوي چې په اکثره ساحو کې د بانکي څانګو نه شتون او په فزيکي بڼه د عوایدو په راټولولو کې مختلفې ستونزې موجودې دي چې له دې وروسته به د يادې تفاهمنامې پر اساس د لومړي ځل لپاره ملي عواید په شفافه توګه په پرېښنایي ډول په ټاکلي وخت راغونډيږي او په عین وخت کې به د مالیې وزارت واحد حساب ته انتقال شي.”
د حسیني په وینا، په برېښنايي توګه د عوایدو راټولول به مراجعینو ته هم ډېرې اسانتیاوې برابرې کړي چې و به وکولای شي په ډېر کم وخت او نږدې ساحه کې له تعرفوي لګښت پرته خپل مالیات او فيسونه تحويل كړي.
هغه زیاته کړه: “موږ هوډ لرو چې د افغانستان اسلامي امارت د زعيم عالیقدر امیرالمؤمنین حفظه الله دوه حکمونه چې په کې د عوایدو په برېښنايي بڼه او د بانکونو له لارې د راټولولو هدایت شوی؛ په ټولو هغو وزارتونو او امارتي ادارو کې تطبیق کړو چې اوسمهال یې ځینې عواید په فزيکي بڼه راټوليږي، ترڅو ټول عوايد په برېښنايي بڼه او بانک له لارې راټول شي.”
د عوایدو لوی رئیس څرګنده کړه چې په نږدې راتلونکي کې به د مالیې وزارت د «افمس» نوی سیسټم چې په عصري بڼه جوړ شوی دی؛ د افغانستان بانک د تادیاتو له سيسټم سره وصل شي، څو د معاش او مصارفاتو تادیه کول هم په برېښنايي بڼه د «چیک» د چاپ پرته ترسره شي، چې په دې سره به هم سرعت او شفافیت رامنځته شي او هم به د فزيکي چيکونو د مصارفو سپما او په فزيکي ډول د انتقال مخه ونيول شي.
د یادونې وړه ده چې د اداینيزو/تادیاتي سیسټمونو نښلول د هېواد د مالي زېربنا د پیاوړتیا، د تادیاتي بهیر د چټکتیا، شفافیت او مؤثریت د زیاتوالي لپاره یو مهم ګام بلل کېږي. دغه سیسټمونه د افغانستان اسلامي امارت له بیاواکمنۍ وروسته د بهرنیو شرکتونو له لوري وتړل شول، خو اوس د افغانستان بانک د مالیې وزارت په غوښتنه دا سیسټمونه د خپلو داخلي کادرونو په هڅو بېرته رغولي دي.
د دغه نوښت له لارې، نه یوازې د دولتي عوایدو راټولولو، لګښتونو او معاش مدیریت اسانېږي، بلکې سوداګر او مالي بنسټونه به وکولای شي خپلې راکړې ورکړې په مؤثره توګه ترسره کړي.
