د افغانستان او عربي متحدو اماراتو ترمنځ خبرې وشوې
دید خبرې آژانس: په عربي متحدو اماراتو کې د اسلامي امارت سفیر مولوي بدرالدین حقاني، د ياد هېواد د بهرنیو چارو وزارت د بهرنیو اتباعو له مسئول ډاکټر ماجد المنصوري سره کتلي دي.
په ابوظبي کې د افغانستان اسلامي امارت سفارت پرون د يوې خبرپاڼې په خپرولو سره ليکلي چې په دې کتنه کې د افغانستان اسلامي امارت سفیر د اماراتو له دولت څخه مننه کړې چې زرګونو افغانانو ته یې د کار، سوداګرۍ او مېشتېدو ښه فرصتونه برابر کړي دي.
هغه، دغه راز افغانانو ته د ویزو ورکړې په برخه کې د لازمو اسانتیاوو غوښتنه کړې او اويلي يې دي چې په عربي متحدو اماراتو کې له ټولو زنداني افغانانو سره دې له نږدې د پوښتنې او لیدنې اسانتیاوې برابرې شي او په دې لړ کې یې د اماراتو د دولت له اړخه د روژې مبارکې میاشتې په پار د یو شمېر افغان بندیانو په عفوه ټینګار کړی دی.
د عربي متحدو اماراتو د بهرنیو چارو وزارت د بهرنیو اتباعو مسئول هم د افغانستان اسلامي امارت د سفیر د هڅو ستاینه کړې او ډاډ یې ورکړی چې د یادو موضوعاتو د حل په برخه کې به اسانتیاوې رامنځته کړي.
د کتنې په پای کې، دواړو لوریو پر سیاسي، اقتصادي او فرهنګي اړیکو خبرې کړې دي.
