د اطلاعاتو او کلتور وزارت لخوا؛ د لونګ او نوای زن راډیوګانو شکایتونه وڅېړل شول

دید خبرې آژانس: د اطلاعاتو او کلتور وزارت د خپرونو چارو د معين او د رسنیزو سرغړونو د ارزونې کمېسیون د مرستیال مهاجر فراهي په مشرۍ، د دغه کمېسیون نوبتي ناسته ترسره شوه.

د ناستې په پیل کې د خپرونو چارو معین، د کمېسیون د تېرې ناستې د پرېکړو او لاسته راوړنو ارزونه کړې ده.

د رسنیزو سرغړونو د ارزونې کمېسیون په دې ناسته کې د دوو راډیوګانو (لونګ او نوای زن) د شکایتونو د څېړنې سربېره، د افغانستان د ژورنالیستانو اتحاديې له خوا د رسنیو د کارکوونکو ستونزې له کمېسیون سره شریکې شوې او ترڅنګ يې د رسنیزو خپرونو په جریان کې د ملي او اسلامي هویت د تثبیت او ټینګښت په موخه د الفاظو، اصطلاحاتو او القابو د اصولي کارونې او تثبیت لپاره کمېټه ټاکل شوې ده.

په ناسته کې پر شپږو نورو موضوعاتو هم بحث شوی او په اړه يې لازمې پرېکړې شوې دي.