دید خبرې آژانس: د اسلامی امارت د ترافيک پوليسو لوی رياست د اختر په ورځو کې د هېواد په کچه د ۸۰ ترافيکي پېښو د رامنځته کېدو خبر ورکړی دی.
ياد رياست د يوې خبرپاڼې په خپرولو سره ويلي چې سږ کال د کوچني اختر په څلورو ورځو کې يعنې د روژې مبارکې میاشتې له ۲۹ مې څخه بيا د اختر تر ۳مې نېټې پورې په ټول هېواد کې ۸۰ ترافیکي پېښې رامنځته شوې، چې په پايله کې يې ۳۰ تنه شهيدان او ۱۵۵ نور ټپيان شوي دي.
د خبرپاڼې د مالوماتو له مخې په شهيدانو کې ۱۹ تنه نارینه ۲ تنه مېرمنې او ۹ تنه ماشومان دي او په ټپيانو کې بیا ۱۱۷ تنه نارینه ۸ تنه مېرمنې او ۳۰ تنه ماشومان شامل دي.
سرچينې زياته کړې، چې تېر کال بیا د اختر په څلورو ورځو کې ټولټال ۹۸ ترافيکي پېښې رامنځته شوې وې، چې په پايله کې يې ۵۰ تنه شهيدان او ۱۸۵ تنه ټپيان شوي وو.
په خبرپاڼه کې همدارنګه څرګنده شوې، چې هېوادوالو ته د عامه پوهاوي ورکول، د ترافیک پولیسو او امنيتي ځواکونو له لوري د اختر په شپو ورځو کې ټينګ امنيتي تدابير د دې لامل شوي، چې په ټول هېواد کې د ترافيکي پېښو او د دغو پېښو له کبله د مرګ ژوبلې کچه راټیټه شي.
د ترافیک پولیسو لوی ریاست يو ځل بيا له هېوادوالو غوښتنه کړې، چې ترافيکي اصولو ته جدي پاملرنه وکړي او د تګ راتګ پر مهال په بشپړه توګه دغه اصول او قوانين مراعات کړي، ترڅو د ناوړه ترافیکي پېښو مخنيوی وشي.
