دید خبرې آژانس: د اسلامی امارت امنیتي مسوولین وایي، د کوچني اختر را رسېدو سره په ټول هېواد کې امنیتي تابیاوې نیول شوي او هېوادوال کولای شي چې په ډاډمن چاپېریال کې د اختر خوښۍ ونمانځي.
د دوی په خبره، چیک پواینټونه او ګرځنده ګزمې یې زیاتې کړي څو خلک د اختر شپې او ورځې په خوشحالۍ سره تېرې کړي.
د ننګرهار امنیه قومندانۍ د امنیتي چارو مرستیال، محمد طاهر مبارز و ویل: « ننګرهار کې به ستاسو ښه مېلمه پالنه کېږي او اسلامي امارت مجاهدین به ستاسې ملګري وي تاسو ته به لارښوونه او ستاسې ساتنه به کوي.»
د لغمان امنیه قومندان، نجیب الله بدخشي و ویل: «زمونږ امنیتي ځواکونه به د دوی په خدمت کې وي، د لغمان ولسونو ته ډاډ ورکوم چې د امنیت په فضا کې د خپل ژوند او اختر شېبې په خوښۍ تېرې کړي.»
د بدخشان امنیه قومندانۍ د امنیتي چارو مرستیال، دوست محمد عبیده وایي، دغه ولایت کې یې ګډ امنیتي پلان جوړ کړی او زیاتوي چې: «د بدخشان په مرکز کې مو ځانګړی پلان جوړ کړی دی؛ ځکه چې ګڼه ګوڼه ډېره ده.»
ګڼ کورني سېلانیان د اختر ورځو او نورو عمومي رخصتیو پر مهال د هېواد طبیعي ښکلاو لېدو ته ورځي. امنیتي مسوولین دغو سېلانیانو ته ډاډ ورکوي چې په ارامۍ سره د اختر خوشالۍ ونمانځي.
د نورستان امنیه قومندان، محمد یوسف جمال و ویل: «ټولو سېلانیانو ته ډاډ ورکوو چې د نورستان په ټولو سیمو او په لویو لارو کې د بشپړ امنیت ډاډ ورکوو.»
د کونړ امنیه قومندان، ضیاءالحق حامد و ویل: «د کونړ ولایت اوسېدونکي دې په امنیتي فضا کې د اختر شېبې ونمانځي او هغه سېلانیان چې له نورو سیمو راځي کولی شي د کونړ له ټولو سیمو لیدنه کولی شي او خپل اختر ونمانځي.»
د تخار د امنیه قومندانۍ ویاند، ذبیح الله حکیمي څرګنده کړه: « امنیتي، کشفي او دفاعي ځواکونه په همغږۍ سره په ښار کې د ولس د ډاډ او امنیت لپاره را وتلي؛ څو د دوی امنیت خوندي وساتي.»
د کندوز د امنیه قومندانۍ ویاند، جعمه الدین خاکسار هم و ویل: « امنیه قومندانۍ، قول اردو او استخباراتو ریاست سره په ګډه مو د کندوز په ښار کې ګرځنده چیک پواینټونه په لاره اچولي دي.»
ورته مهال ځینې هېوادوال د عامه نظم او امنیت ګډوډونکو پر وړاندې د جدي اقداماتو غوښتونکي دي.
د اسلامي امارت له بیا واکمنېدو او په هېواد کې د سراسري امنیت ټینګښت سره سم، ګڼ کورني سېلانیان د اختر او نورو عمومي رخصتیو پر مهال د هېواد له طبیعي ښکلاو او تاریخي سیمو لیدنه کوي.
