دوستم: په راتلونکي کې به افغانستان ته ځو
دید خبرې آژانس: د کندهار د پخواني امنيه قوماندان عبدالرازق اڅکزي د وژل کېدو د شپږم تلین په مناسبت، عبدالرشيد دوستم سياسي مشرانو ته په خطاب کې وويل: «موږ او تاسو به په راتلونکي کې افغانستان ته ځو او هېواد به ازادوو.»
مارشال دوستم ټینګار کړی، چې که سیاسي مشران تر یو چتر لاندې سره راټول شي، د افغانستان وضعیت به بدل شي.
په دې مراسمو کې چې په مجازي توګه ترسره شول د ملي غورځنګ ګوند مشر مارشال دوستم د طا-لبانو له مخالفانو وغوښتل چې د افغانستان د ژغورنې لپاره د ګډ دریځ په غوره کولو کې هڅې وکړي.
هغه ټینګار وکړ، چې دا مهمه نه ده چې په کوم نوم، خو ټولې هغه ډلې چې د طا-لبانو مخالفې دي باید راټولې شي.
دوستم په ډاګه کړه، چې طا-لبان به د ګاونډیو هېوادونو او نړۍ له خوا ونه منل شي او که سیاسي مشران سره راټول شي، د افغانستان د ژغورنې هیله به پیدا شي.
هغه زیاته کړه، چې د طا-لبانو د مخالفانو نه اتحاد به د خلکو زړونه له هغو مشرانو چې په بهر کې دي ساړه کړي.
هغه د طا-لبانو له مخالفو سیاسي ډلو وغوښتل چې د افغانستان د ښځو، کډوالو او په سختو شرایطو کې د افغانانو لپاره د هیلو د پیدا کولو لپاره یو مشخص ادرس معرفي کړي.
د طا-لبانو مخالفو سیاسي ډلو په تېرو درېیو کلونو کې بېلابېل حرکتونه پیل کړي او په ویشل شوي ډول فعالیت کوي.
