دا/عش په ډايکندي کې ۱۴ کسان په ډله ایزه توګه ووژل
دید خبرې آژانس: له وروستیو معلوماتو سره سم، د ډايکندي او غور تر منځ ۱۴ ملکي هزاره کسان په ډزو سره وژل شوي او ورسره هم مهاله د دا/عش خراسان څانګې د ډايکندي او غور تر منځ په هزاره مېشتې سیمه کې د هزاره وو د وژنو مسئولیت پرغاړه اخیستی دی.
دې ډلې په خپله خبرپاڼه کې ويل شوي چې په دې برید کې ۱۵ تنه وژل شوي او شپږ نور ژوبل دي.
د دې پېښې د قربانیانو له خپاره شوي نوملړ څخه ښکاري چې څلور تنه نور ژوبل دي، خو ځيني سرچینې د ژوبلو کسانو شمېر زیات ښيي. د سرچینو په وینا، د ځینو ژوبلو کسانو وضعیت خراب دی. د پېښې ټول قربانیان نارینه دي.
د سرچینو په وینا، ټول قربانیان د ډايکندي د سنګتخت او بندر ولسوالۍ د «قریودال» سیمې اوسېدونکي دي. دوی پرون غرمه (پنجشنبه، ۲۲ د وږي) د کربلا د زیارتوالو مخې ته د ډايکندي او غور تر منځ یوې سيمې ته د هرکلي لپاره تلل.
يوه ژوبل کس ويلي چې شاوخوا له ۲۰ تر ۲۵ کسانو پوري د کربلا زیارت ته تللي وو او کله چې دوی د دایکندي د «قریودال» او د غور د «پهلوسنګ» کليو تر منځ د زیارتوالو راتلو ته منتظر وو، د وسلوالو کسانو له خوا پرې ډزې وشوې.
د دې کس په وینا، وسلوال څلور کسان وو چې پر دوو موټرسایکلونو سپاره وو.
په غور او ډايکندي کې طا-لب چارواکی په دې اړه څه نه دې ويلي.
پخوا هم د غور او له ډایکندي تر منځ او د دې ولایتونو پر مواصلاتي لاره هزاره وګړي د وژنو له پېښو سره مخ شوي دي.
د سرچینې په وینا، نننی برید په داسې مهال کې شوی چې دوې ورځې وړاندې په ډایکندي کې د طا-لبانو والي د ډایکندي-غور د لارې د امنیت په اړه ډاډ ورکړی وو.
