دید خبرې آژانس: د اسلامي امارت د اطلاعاتو او کلتور وزارت سرپرست ملا خیرالله خیرخواه، په کابل کې د ایران له سفیر علیرضا بیگدلي سره کتلي دي.
په رارسېدلې خبرپاڼه کې راغلي چې په دې کتنه کې د اطلاعاتو او کلتور وزارت سرپرست، د افغانستان او ایران ترمنځ د ګډو کلتوري او تاریخي ارزښتونو یادونه کړې او کلتور یې د دواړو هېوادونو د اړیکو د پراختیا او پیاوړتیا لپاره مهم بللی دی.
ملا خیرخواه زیاته کړې چې اوسمهال تر هر وخت ښه د کلتوري تعاملاتو لپاره مناسب فرصت برابر شوی دی.
هغه د ګرځندوی صنعت د ودې لپاره، د کلتوري نندارتونونو، لاسي صنایعو او ګرځندوی فعالیتونو پر تنظیمولو ټینګار کړی دی.
همدا رنګه، د ایران سفير ویلي چې د افغانستان او ايران اړیکې پر کلتور ولاړې دي او د لا پياوړتيا لپاره يې باید ډېرې هڅې وشي.
د کتنې په پای کې، دواړو لوريو د اصیل کلتور د معرفي کولو او کلتوري همکاریو د پیاوړتیا ژمنه کړې ده.
