جنک اونال: ترکانو افغانستان کې په مېلیاردونو ډالرو پانګونه کړې
دید خبرې آژانس: په کابل کې د ترکیې سفیر جنک اونال ویلي، چې د دغه هېواد پانګوالو په افغانستان کې د برېښنا او کانونو په برخو کې، مېلیاردونه ډالره پانګونې کړې دي.
ښاغلي اونال ټينګار کړی، چې افغانستان ځينې پرمختګونه کړي او کهچېرې پانګونې ته لا ښه شرایط برابر شي، د ترکي پانګوالو ترڅنګ، د نورو هېوادونو پانګوال به هم په افغانستان کې پانګونه وکړي.
کابل کې د ترکیې سفیر ویلي:«موږ وینو، په افغانستان کې ګڼې پروژې د ترکانو له لوري ترسره شوې دي، چې ارزښت یې مېلیاردونو ډالرو ته رسېږي. اوس په افغانستان کې مثبت پرمختګونه شوي، چې یو له هغو امنیت دی؛ ځکه چې سراسري امنیت شته. که شرایط نور هم ښه شي، نو یوازې د ترکیې نه؛ بلکې د نورو بېلابېلو هېوادونو پانګوال به هم پانګونه وکړي.»
ښاغلی اونال زیاتوي، چې افغانان او ترکان د تاریخ په اوږدو کې د یو بل ترڅنګ پاتې شوي او او اوسمهال هم د ترکیې سفارت په کابل کې فعال دی او له افغان چارواکو سره نېغ په نېغه اړیکې او دوه اړخیزې همکارۍ لري.
جنک اونال همدارنګه زیاته کړه:«موږ له افغان چارواکو سره نېغ په نېغه اړیکې لرو. د ترکیې سفارت هېڅکله په افغانستان کې خپل فعالیتونه نهدي درولي او خپلو چارو ته یې دوام ورکړی. که موږ کومه غوښتنه ولرو، له چارواکو سره یې شریکوو او هغوی هم له موږ سره همکاري کوي.»
بلخوا، د افغانستان د کرنې او مالدارۍ خونه، ترکیه یوه ښه سوداګریزه شریکه بولي او د کرنې په برخه کې د دغه هېواد د پر لا ډېرو پانګونو ټینګار کوي.
د کرنې او مالدارۍ خونې مرستیال میرویس حاجيزاده ویلي:«ترکیه یو اسلامي هېواد دی او موږ ورسره ډېرې ښې اړیکې لرو. ترکیې په تېرو وختونو کې هم په افغانستان کې پانګونه کړې وه، او اوس هم زموږ د سوداګرو، حکومت او ملت غوښتنه دا ده، چې په راتلونکي کې هم په بېلابېلو برخو، په ځانګړې توګه د کرنې، برخه کې پانګونه وکړي.»
له ترکیې سره د افغانستان اقتصادي او سوداګریزو اړیکو ته په پام سره، ځينې افغان سوداګر له ترکیې غواړي، چې د سوداګریزو ویزو د صادرولو او د بانکي ستونزو د حل په برخه کې ورسره همکاري وکړي.
