جلالی د علي جناح روغتون له روغتيايي خدمتونو څخه ليدنه وکړه
دید خبرې آژانس: د اسلامي امارت د عامې روغتیا وزارت سرپرست مولوي نور جلال جلالي د نېکمرغه کوچني اختر په لومړۍ ورځ د یو شمېر مرکزي رئیسانو په ملتیا په کابل کې د علي جناح روغتون له روغتیايي خدماتو څخه لیدنه ترسره او هم یې د یاد روغتون له روغتیایي کارکوونکو سره له نږدې ليدلي دي.
ياد وزارت د يوې خبرپاڼې په خپرولو سره ويلي چې نوموړي په دې په دې لیدنه کې د بستر ناروغانو څخه له نږدې عیادت تر سره او له ناروغانو سره يې مالي مرسته هم کړې ده.
ښاغلي جلالي د یاد روغتون بېلابېلې برخې له نږدې کتلې، روغتیایي کارکوونکو ته یې د ولس لپاره د اختر په ورځو کې د غوره روغتیایي خدماتو سپارښتنې کړې او د دوی له هڅو یې په مادي او معنوي لحاظ قدردانی کړې ده.
د یادونې وړ ده، چې د عامې روغتیا وزارت د رهبرۍ په لارښوونه د هېواد په ټولو ولایتونو او مرکز کې د اختر پر مهال د روغتیایي مراکزو فعال ساتلو سپارښتنه شوې، څو د اختر په ورځو کې هېوادوال د روغتیا په برخه کې له ستونزو سره مخ نه شي.
