دید خبرې آژانس: د عامې روغتیا وزارت سرپرست مولوي نور جلال جلالي، په کابل کې د قطر له شارژدافیر مُردف القاشوطي سره کتلي دي.
د عامې روغتیا وزارت په خپره شوې خبرپاڼه کې راغلي چې په دې کتنه کې د روغتونونو لپاره د تجهیزاتو د برابرېدو، په کندهار کې د قطر له لوري د جوړېدونکي ۴۰۰ بستریز روغتون او د روغتیايي پرسونل د ظرفیت لوړولو په اړه خبرې شوې دي.
د عامې روغتیا وزارت سرپرست په خپلو خبرو کې، د قطر د دوامدره همکاریو د مننې ترڅنګ؛ په معیاري توګه د ناروغانو ستونزو ته د رسېدنې او غوره خدمتونو په موخه د روغتیايي کارکوونکو د ظرفیت لوړول او په اړینو تجهیزاتو د افغانستان د روغتونونو سمبالول مهم یاد کړي او په دې برخه کې یې د یاد هېواد همکاري اړینه بللې ده.
د قطر شارژدافیر هم د خپل هېواد دومداره همکاریو ته په اشارې سره؛ په یادو برخو کې د افغانستان له عامې روغتیا وزارت سره د همکارۍ ډاډ ورکړی دی.
