دید خبرې آژانس: د اسلامی امارت د عامې روغتیا وزارت سرپرست مولوي نورجلال جلالي، د «آیافآرسي» مؤسسې له مشر احمد سلیمان سره کتلي دي.
د عامې روغتيا وزارت په خپره شوې خبرپاڼه کې راغلي چې په دې کتنه کې پر دوه اړخیزو همکاریو، لا ښې همغږۍ پر رامنځته کولو، د روغتیايي خدمتونو پر ښه والي او د روغتیايي کارکوونکو پر لا ښه مدیریت خبرې شوې دي.
د عامې روغتیا وزارت سرپرست، د يادې مؤسسې له مشر څخه د راستنېدونکو هېوادوالو لپاره د روغتیايي خدمتونو د برابرولو، په اندراګاندي روغتون کې د ماشومانو د زړه جراحي عملیاتو د پیلولو اړوند ملاتړ، د روغتیايي کارکوونکو ظرفیت لوړولو او نورو برخو کې د همکاریو غوښتنه کړې ده.
همدا رنګه د «آیافآرسي» مؤسسې مشر، په افغانستان کې د خپلو روغتیايي فعالیتونو په اړه معلومات ورکړي او د عامې روغتيا وزارت د غوښتنو په اړه د همکارۍ ژمنه کړې ده.
