دید خبرې آژانس: د اسلامی امارت د امربالمعروف، نهی عن المنکر او شکایتونو اورېدو وزارت د تېرې (کب) میاشتې فعالیتونه رسنیز کړل.
سرچینې د یوې خبرپاڼې په خپرولو سره ویلي چې د امربالمعروف، نهی عن المنکر او شکایتونو اورېدلو وزارت محتسبینو په پلازمېنه کابل او ولایتونو کې تېره میاشت د مېرمنو د ټولو شرعي حقونو د خوندیتوب او ورکړې ته په ژمنتیا د ۸۴ مېرمنو حقوقي قضیو ته رسېدنه کړې، چې له ډلې یې ۳۲ مېرمنې د میراث او مهر له حقونو څخه برخمنې شوې دي، د ۲۲ مېرمنو د اجباري نکاح او بدو کې د ورکړې پېښو مخه نیول شوې او ۳۰ مېرمنې له کورني تاوتریخوالي څخه ژغورل شوې دي.
په خبرپاڼه کې همدرانګه ویل شوي، چې د امربالمعروف، نهی عن المنکر او شکایتونو اورېدلو وزارت محتسبینو په یاده موده کې د ټولنیز عدالت، یووالي او اسلامي ارزښتونو پیاوړتیا په برخه کې د خپلو هڅو په دوام د هېواد په بېلابېلو ولایتونو کې د ۷۷ دښمنیو او قومي شخړو مخه نیولې او ښکېلو اړخونو ترمنځ یې سوله کړې ده.
د سرچینې د مالوماتو له مخې د امربالمعروف، نهی عن المنکر او شکایتونو اورېدلو وزارت محتسبینو د تېر کال کب میاشتې په اوږدو کې د هېواد په کچه د خرافاتو، غیر شرعي کړنو او د فساد د مخنیوي په موخه ۱۸ تنه کوډګر نیولي او د نورو څېړنو په موخه یې عدلي او قضایي ارګانونو ته سپارلي دي.
د خبرپاڼې د مالوماتو له مخې په یاده موده کې همدارنګه له دغه وزارت سره ټولټال ۱۰۶۱ شکایتونه ثبت شوي دي، چې ګڼ شمېر ته یې رسېدنه شوې او پاتې نورو د حل په موخه هڅې دوام لري.
