تېره میاشت په ټول هېواد کې ۱۵۰ زره تذکرې وېشل شوې

دید خبرې آژانس: د احصايې او معلوماتو ملي ادارې د روان ۱۴۰۳ لمریز کال په لېندۍ میاشت کې د هېواد په کچه د څه باندې ۱۵۰ زره برېښنايي پېژندپانو د وېشل کېدو خبر ورکړی دی.

سرچینې د یوې خبرپاڼې په خپرولو سره ویلي چې په لېندۍ میاشت کې د ټول هېواد په کچه د برېښنايي پېژندپاڼو او آسان خدمت له لارې ۱۵۰ زره او ۳۰۰ هېوادوالو ته برېښنايي پېژندپاڼې وېشلې دي.

د خبرپاڼې د معلوماتو له مخې د وېشل شویو برېښنايي پېژندپاڼو تر ټولو ډېرې یې په کابل ولایت کې ۵۴ زره او ۱۱۸، په کندهار کې ۱۱ زره او ۷۹۳، په بلخ کې ۶ زره او ۹۸۱، بغلان کې ۶ زره او ۸۱۶ او هلمند ولایت کې ۶ زره او ۳۸۱ وېشل شوې دي.

سرچینې زیاته کړې، چې تېرې لېندۍ میاشت کې د ټول هېواد په کچه ۱۱ زره او ۷۷۲ نورو کسانو ته د برېښنايي پېژندپاڼو له وېش وروسته خدمتونه هم وړاندې شوي دي.