دید خبرې آژانس: د تورخم کمیسار ملا عبدالجبار حکمت ویلي، دغه لار چې وړمه ورځ د ټرانزیټ پرمخ پرانیستل شوې وه، له دوه ورځني ځنډ وروسته نن د مسافرو پرمخ هم پرانیستل شوه.
یاده لاره چې ټاکل شوې وه، پرون (جمعې) په ورځ خلاصه شي، د فرضي کرښې هغې غاړې ته د وسایلو د تخریب له کبله یې پرانیسته یوه ورځ وځنډېده.
بل لورته د ننګرهار د اطلاعاتو امر ویلي، چې د تورخم دروازې د بندېدو له امله زرګونه مسافر دواړو غاړو ته بند پاتې دي، چې له امله یې هلته ډېره ګڼه – ګوڼه رامنځته شوې ده.
نوموړی زیاتوي، چې دغه ګڼه ګوڼه به په راتلونکو دوو یا درېیو ورځو کې کمه شي او له همدې امله له خلکو څخه غوښتنه کوي، چې د امکان تر بریده دوه ورځې انتظار وکړي، څو د زیاتې ګڼې ګوڼې له امله په تکلیف نه شي.
