ترانسپورت وزارت: بدخشان کې د ځمکني ترمینل د جوړېدو چارې پیل شوې
دید خبرې آژانس: د اسلامی امارت د ټرانسپورټ او هوايي چلند وزارت د بدخشان مرکز فیض اباد ښار کې د لومړني ځمکني ترمینل د جوړولو چارې پیل کړې دي.
د دغه وزارت مرستیال وايي، پر دغې پروژې ۶۰ میلیونه افغانۍ لګښت راځي او پر لس جریبه ځمکه جوړیږي.
د ټرانسپورټ او هوايي چلند وزارت مرستیال، عبدالسلام حیدري ویلي: «د واخان پروژې چارې به هم ډېر ژر بشپړې شي او دا ترمینل به په دې سیمه کې ډېر ګټور وي، ځکه خلکو ته ګټه رسوي.»
د بدخشان والي، محمد ایوب خالد ویلي: «دا ترمینل د عمومي سړک ترڅنګ جوړیږي او موقعیت یې مناسب دی، ځکه موږ هیله لرو چې له چین سره لاره پرانیستل شي او نور ترمینلونه هم دلته جوړ شي. موږ هوډ لرو او د سړک جوړولو او پراختیايي کارونه روان دي.»
د ټرانسپورټ او هوايي چلند وزارت په تېره یوه اوونۍ کې په څو ولایتونو کې د ځمکنیو ترمینلونو د جوړولو چارې پیل کړې دي.
