بیکدلي له افغانستان سره د سرحدي او سوداګریزو اړیکو پر پیاوړتیا ټينګار وکړ
دید خبرې آژانس: په کابل کې د ایران سفارت سرپرست عليرضا بیکدلي، د خلکو د تګ راتګ په موخه د دواړو هېوادونو د پولو پراختیا او د کابل او تهران ترمنځ د سوداګریزو اړیکو پراختیا، د افغانستان پر وړاندې د خپل هېواد له بنسټيزو سیاستونو بللي دي.
ښاغلي بیکدلي ټينګار کړی چې د دواړو لورو له همکارۍ سره، د سرحدي ولایتونو پرمختیا او د سرحدي سړکونو معیاري کول به، د دواړو هېوادونو د اړیکو د پراختیا لامل شي.
په کابل کې د ایران سفارت سرپرست وايي:«پر هغه څه چې د ایران د اسلامي جمهوریت د سیاست په توګه پرې باور لرو دا دي چې زموږ او تاسو ترمنځ ټولې لارې، د دواړو هېوادونو د خلکو د تګ راتګ، سوداګرۍ او د موټرو د تګ راتګ لپاره مناسبې لاروې وي.»
عليرضا بیدکلي د چابهار بندر په تړاو هم ویلي، هڅې روانې دي چې، په چابهار بندر کې د افغانستان د استازو حضور ته زمینه برابره شي.
تر دې مخکې د روان هجري لمریز کال په غبرګولي میاشت کې د هند د بهرنیو چارو وزیر هم د سیمهییزو اړیکو د پراختیا لپاره د چابهار بندر نوي ډهلي لپاره مهم بللی وو او زیاته کړې یې وه چې، له چابهار بندره به له افغان ولس سره له مرستو سربېره د منځنۍ اسیا له هېوادونو سره د سوداګریزو چارو د پراختیا لپاره استفاده وکړي.
