دید خبرې آژانس: د ا.ا د بهرنیو چارو وزارت ویاند عبدالقهار بلخي افغانستان کې د پاتې شویو امریکایي وسلو په تړاو د اسلامي امارت او ډانلډ ټرمپ د حکومت ترمنځ د احتمالي معاملي په اړه وایي، اوس لپاره غوره لار د ډیپلوماسۍ له لارې تعامل او د ګډو ګټو او اندېښنو د حل لارو پیدا کول دي.
عبدالقهار بلخي له سي بي اس نیوز سره خبرو کې د وسلو په بدل کې د افغانستان بانک د کنګل شوې شتمنۍ د ازادولو په تړاو د ټرمپ د خبرو په غبرګون کې زیاته کړې، چې دغه شتمنۍ د افغانستان د خلکو دي او په خبره یې، په ناسمه توګه کنګل شوې دي.
ښاغلي بلخي په دې اړه ویلي: « هېوادونه چېرته خپلې شتمنۍ نه پرېږدي. دا د افغانستان د دولت شتمنۍ دي.» د نوموړي په خبره: « خلک د دولت په شتمنۍ معامله نه کوي بلکې، تر اوږدو مذاکراتو وروسته هوکړې کوي او موږ په تېر کې هم د ټرمپ له حکومت سره دغه راز هوکړې کړي او موږ په راتلونکي کې هم د دغه راز هوکړو لپاره مذاکرات غواړو.»
هغه له امریکا سره د تعامل په اړه ویلي، که دواړه لوري عادي اړیکې ولري نو په خبره یې، کولای شي د ګډو ګټو او اندېښنو لپاره کار وکړي.
بلخي ویلي، اسلامي امارت غواړي په واشنګټن کې خپل سفارت پرانیزي او کابل کې د امریکا د سفارت له پرانیستو سره هیڅ ستونزه نه لري.
هغه له امریکا سره د ډیپلوماټیکو اړیکو په اړه زیاته کړه: « په څه باندې ۴۰ هېوادونو کې زموږ سفارتونه پرانیستې دي او هیله لرو چې په ۲۰۲۵ کې زیات شي، موږ غواړو په واشنګټن کې خپل سفارت پرانیزو، نیویارک کې خپله کونسلګري پرانیزو، هلته سلګونه زره افغانان اوسي او دوی د کونسلي خدمتونو حق لري. موږ کابل کې د امریکا سفارت له پرانیستو سره هیڅ ستونزه نه لرو.»
ښاغلي بلخي د واشنګټن او کابل ترمنځ امنیتي همکاریو په تړاو څرګنده کړې چې امنیت ګډې ګټې دي او په خبره یې، داعش په افغانستان کې ریښې نه لري.
د اسلامي امارت دغه چارواکي په دې اړه و ویل: «امنیت ګډې ګټې دي او موږ داسې افغانستان غواړو چې هیڅ لوري ته ګواښ نه پېښوي او دا د امریکا ګټې هم دي.» او زیاته کړې یې ده: « امنیت یو پراخه برخه ده او افغانستان د خپلو ژمنو لمخې، د ګواښ نه پېښولو بهرنۍ پالیسي لري او دغه پالیسي ډیپلوماټیک تعامل ته اړتیا لري څو هغو لورو ته ډاډ ورکړي چې امنیتي اندېښنې لري.»
د بهرنیو چارو وزارت ویاند د امریکا له حکومت سره د افغانستان پر طبیعي زېرمو د هوکړې په اړه د پوښتنې په ځواب کې ویلي: « زموږ پالیسي دا ده چې موږ له هر چا سره کار ته چمتو یو.»
هغه زیاته کړې: «زموږ دروازې د ټولو پر مخ پرانیستې دي او موږ د امریکا په ګډون له ټولو هېوادونو سره د اړیکو د نوي څپرکي پرانیستو ته چمتو یو.»
عبدالقهار بلخي افغانستان کې پر ښځو او نجونو د ښوونیز بندیز په اړه د پوښتنې په ځواب کې ویلي، « دا د افغانستان کورنۍ مسله ده.» هغه زیاته کړې: « هر حکومت حق لري چې د خپلو قوانینو په اړه پرېکړه وکړي او دا د هر هېواد خپلواک حق دی.»
د بهرنیو چارو وزارت ویاند دغه مرکه کې ویلي، د ټرمپ له حکومت سره داسې مذاکرات غواړي چې د بشري حقونو او سوداګرۍ په ګډون د دواړو لورو ګډې ګټې خوندي کړي.
