بروس: داسې نوملړ نشته چې د افغانانو د لېږد مخنیوی وکړي
دید خبرې آژانس: د امریکا د بهرنیو چارو وزارت اوس اوس ویلي، داسې کوم نوملړ نشته چې موخه یې د هغو افغانانو د لېږد مخنیوی وي چې د امریکایي ځواکونو پخواني همکاران وو.
د دغه وزارت ویاندې زیاته کړې، چې د افغانانو مېشتنېدنه د واشنګټن د تګلارو یوه برخه ده او د امنیتي اروزنې بهیر د امریکا د امنیت ساتلو لپاره د ولسمشر ډانلډ ټرمپ له اجرایي فرمان سره سم، دوام لرم.
ټمي بروس په دې هکله زیاته کړې:«هغه څه چې د بهرنیو چارو وزارت د یوه نوملړ په توګه مطرح کېږي، واقعیت نهلري. نو، زه باید ووایم چې دا مسئله په بنسټیز ډول ناسمه ده او زه نشم کولای پر هغه څه تبصره وکړم، چې ناسم وي. د افغانستان او د هغو کسانو په تړاو چې له موږ سره یې مرسته کړې، باید وویل شي، چې موږ له پخوا راهیسې د مخکیني حکومت په ګډون د هغو کسانو د لېږد لپاره هڅې کړي، چې په هغو جګړو کې یې حضور درلود، په ځانګړې توګه د هغو کسانو د لېږد لپاره چې له موږ سره یې مرسته او همکاري کړې ده.»
د امریکا د بهرنیو چارو وزارت د ویاندې دغه څرګندونې په داسې حال کې مطرح کېږي، چې ډانلډ ترمپ د امریکا د متحده ایالاتو د کډوالۍ پروګرام د ځنډېدو څلور میاشتنی فرمان لاسلیک کړی دی.
د کډوالو د حقونو فعالان وايي، چې متحده ایالتونه باید په دې برخه کې له خپلو ژمنو سره سم عمل وکړي.
د کډوالو د حقونو فعال محمد خان محمدزی طلوعنیوز ته وايي:«هغه ژمنې چې مخکې وړاندوینه شوې وې، باید عملي شي او له هغو کسانو سره چې په قانوني ویزې په دغه هېواد کې منل شوي دي، همکاري وشي.»
د کډوالو د حقونو بل فعال احسان خان احمدزی هم څرګندوي:«اړینه ده، چې د امریکا حکومت دغو کسانو ته ځانګړې پاملرنه وکړي او هغوی یوازې پرېنږدي، ترڅو له لا زیاتو جدي ستونزو سره مخ نشي.»
دا په داسې حال کې ده، چې تر دې وړاندې رویټرز د باخبرو سرچینو پر حواله راپور ورکړی و، چې د ډانلډ ټرمپ اداره د افغانستان په ګډون د ۴۱هېوادونو پر وګړو متحده ایالتونو ته د سفر پراخ محدودیتونه ارزوي او په دغو محدودیتونو کې به پر سیاحتي وېزو، تحصیلي وېزو او د کډوالۍ پر نورو وېزو د محدودیتونو لګول شامل وي.
