ډيډ خبري اژانس: د بريتانيا حکومت وايي، د خپلو ځانګړو ځواکونو له خوا د افغان اتباعو د وژلو په اړه به پلټنې پيل کړي.
په ۲۰۱۱ او ۲۰۱۲ کلونو کې په افغانستان کې د دغه هېواد د ځواکونو د حضور پر مهال د لسګونو افغانانو په وژلو کې د برتانوي ځانګړو ځواکونو د لاس لرلو په اړه د ادعاوو په اړه څېړنې پیلېږي.
دا خپلواکه څېړنه د برتانیې د دفاع وزارت په امر ترسره کېږي او په پام کې ده چې د دغه هېواد ځانګړو ځواکونو ۵۴ افغانان په ناقانونه توګه وژلي دي.
ټیسا ګریګوري، چې د ۲۹ وژل شویو کسانو د کورنیو استازیتوب کوي، وویل چې د هغې موکلین هیله لري چې دا څیړنه به د دې قضیې په اړه د چوپتیا دیوال پای ته ورسوي او هغه پوښتنو ته ځواب ووایي چې د یوې لسیزې راهیسې راپورته شوي.
یوه څېړنه ښيي چې ښايي د برتانیا د ځانګړي خدماتو (SAS) له خوا ۸۰ ملکي افغانان وژل شوي وي.
د يادونې وړ ده، چې استراليا هم د افغان اتباعو د وژنې په اړه پلټنې پيل کړې وې، خو تر اوسه يې کومه مثبته پايله نه ده موندلې.
