بامیانو کې څه باندې۱۰۰۰ کورنیو ته د څښاک اوبه برابريږي
دید خبرې آژانس: د بامیانو سیمهییزو مسوولینو د سیغان ولسوالۍ په بېلابېلو سیمو کې د اوبو رسولو ۵ شبکو د رغولو چارو د پیل کېدو خبر ورکړی دی.
د بامیانو والي مولوي عبدالله سرحدي د یادو پروژو د پرانیستې پر مهال وویل، چې سیمهییزه اداره هڅه کوي د خلکو د اړتیا وړ پروژې پلې کړي، څو د دوی ستونزې هوارې او د کار زمینه برابره شي.
والي له سیمهییزو خلکو وغوښتل، چې د شبکو ساتنې ته جدي پاملرنه وکړي.
ورته وخت کې د بامیانو د والي ویاند صبور فرزان سیغاني ویلي، چې دا پروژه د د سیغان ولسوالۍ په خدا داد خېلو، نوآباد، ګیروی خواجه ګنج، پیتاب خواجه ګنج او ده نوله سیمو کې د نړیوال بانک په مالي ملاتړ د اقا خان بنسټ له لوري د ۲۸ میلیونه افغانیو په لګښت پلې کېږي.
د نوموړي په وینا، د یادې پروژې په پلې کېدو سره به د اړوند سیمو ۱۰۸۰ کورنۍ، ۱۵ جوماتونه، یوه دیني مدرسه، ۲ ښوونځي، او ۱ کلینیک ته د څښاک پاکې اوبه برابرې شي.
