دید خبرې آژانس: اسلامي امارت د یوناما د ماموریت له غځېدو وروسته، له دغه بنسټه وغوښتل، چې د افغانستان او نړۍ ترمنځ د تعاملاتو د رامنځته کولو لپاره کار وکړي.
د اسلامي امارت د ویاند مرستیال حمدالله فطرت دغهراز له افغانستانه ګاونډیو هېوادونو ته د ګواښ پېښېدو ادعاوې رد کړې دي.
ښاغلي فطرت زیاته کړه:«دغه استازولي باید خپلې اصلي موخې تعقیب کړي، دوی باید د تېر په څېر د بېځایه تشویشونو په رامنځته کولو، له یو یا دوو جزوي مسایلو څخه په سو استفاده د افغانستان پر وړاندې پروپاګند ته لار هواره نهکړي او د مغرضو کړیو د لاس اله نهشي.»
دا په داسې حال کې ده، چې د ملګرو ملتونو د امنیت شورا له یوې میاشتې سلا مشورو وروسته، تېره شپه (دوشنبې) په ۱۵ موافقو رایو سره د ملګرو ملتونو د یوناما د ماموریت د غځېدو پرېکړهلیک تصویب کړ.
د افغانستان لپاره د یوناما یو کلن ماموریت به پر بشري وضعیت، اقتصاد، نړیوالو مرستو، بشري حقونو او د تعاملاتو پر رامنځته کېدو متمرکز وي.
په ملګرو ملتونو کې د چین استازی فو کینګ په دغې غونډه کې ویلي:«دا پرېکړهلیک د افغانستان د حاکمیت، خپلواکۍ، ځمکنۍ بشپړتیا او ملي یووالي لپاره پرېکنده ژمنې تازه کوي. دا پرېکړهلیک د افغانستان د بدلون په حال کې شرایطو ته په پام سره، د ګڼو اوسنیو ننګونو په تړاو د شورا د غړو دریځونه، تمې او اندېښنې څرګندوي. دا پریکړهلیک هغو ستونزو ته نغوته کوي، چې افغانستان ورسره مخ دی، لکه د هغه اقتصاد، د بشري مرستو نشتوالی، او د نړۍوالو مرستو پر وړاندې خنډونه.»
د برېټانیا، سوېلي کوریا، او امریکا په ګډون د امنیت شورا ځينو غړو د افغانستان د بشري حقونو مسئلې په ځانګړې توګه د ښځو حقونو ته د یوناما پر پاملرنې ټینګار وکړ.
د روسیې د استازي مرستیالې له نړۍوالې ټولنې سره د افغانستان د تعامل او یوځای کېدو مسئله د دغه هېواد د اوږدمهالې سولې لپاره مهمه وبلله.
په ملګرو ملتونو کې د روسیې د استازې مرستیاله انا یویستیګنیوا وايي:«موږ په دې باور یو، چې په دغه هېواد کې اوږدمهالې سوله شونې نهده تر هغو، چې موږ یو هر اړخیز او واقعبینانه چلند غوره نهکړو، چې موخه یې په پای کې له نړۍوالې ټولنې سره د افغانستان بیا ادغام وي. دا چلند باید د وضعیت د یوې عیني او سنجول شوې ارزونې او د ملګرو ملتونو تر څارنې لاندې له واکمنو چارواکو سره د صبر او زغم پر بنسټ وي.»
په ملګر ملتونوکې د امریکا استازې ډوروټي شي څرګنده کړې:«موږ له یوناما غواړو، چې د افغانانو، په ځانګړې توګه د ښځو او نجونو، د بشري حقونو د خوندیتوب لپاره خپلې هڅې لا ډېرې کړي. موږ د یوناما له کاره ملاتړ کوو، څو د بشري ناورین د کمولو او د افغانستان د اقتصاد د ثبات لپاره مرستې برابرې کړي.»
په دې غونډه کې د پاکستان استازي یو ځل بیا د ترهګرۍ د مسئلې په تړاو پر سرپرست حکومت نیوکه وکړه.
په ملګرو ملتونو کې د پاکستان دایمي استازي منیر اکرم ویلي:«اړمنو افغانانو ته د کافي بشري مرستو پر اړتیا سربېره، پاکستان تل ټینګار کړی، چې په افغانستان کې تر ټولو مهمه ننګونه چې ورسره مخ دی، د افغانستان دننه او بهر ترهګري ده. د طا-لبانو حکومت د داعش په لهمنځه وړلو کې اغېزناک نهدی. ګڼو ترهګرو ډلو ته یې ځای ورکړی دی او د پاکستاني طا-لبانو د تحریک، د بلوڅ بېلتونپالو (BLA) او مجید ډلې له لوري د پاکستان پر وړاندې بریدونو کې ښکېل دی.»
د ملګرو ملتونو د سیاسي دفتر یا یوناما ماموریت د ۲۰۲۶ کال د مارچ میاشتې تر ۱۷مې پورې غځېدلی دی.
