ا.ا: ګاونډي هېوادونه دې د افغان کډوالو له جبري اېستلو څخه ډډه وکړي
دید خبرې آژانس: د ا.ا د کډوالو ستونزو ته د رسېدنې عالي کمېسیون غونډه د ریاست الوزراء د اداري مرستیال مولوي عبدالسلام حنفي په مشرۍ د دغه کمېسیون د غړو او ټولو کمېټو د مسوولینو په شتون کې پرون ترسره شوه.
ارګ د یوې خبرپاڼې په خپرولو سره ویلي چې په دغه غونډه کې د یاد کمېسیون او کمېټو د کړنو، لاسته راوړنو او فعالیتونو د بیانولو ترڅنګ د کډوالو ستونزو ته د ښې رسېدنې پر لارو چارو خبرې او پر دې ټینګار وشو، چې د کډوالو ستونزو ته د رسېدنې په برخه کې ټولې کمېټې خپل فعالیتونه لا ګړندي کړي؛ ترڅو خدمات چټک شي، په ځانګړي ډول افغان مهاجرو تجارانو ته په کور دننه اسانتیاوې برابرې او د پانګونې فرصوتونه ورته رامنځته شي.
په غونډه کې همدارنګه له ګاونډیو هېوادونو څخه غوښتنه شوې، چې د افغان کډوالو له بېړني او جبري اېستلو څخه ډډه وکړي او د کډوالو لپاره د کړو خدمتونو پای په حسن اختتام سره وکړي او د دواړو هېوادونو په همغږي د یوه ګډ میکانیزم له مخې افغان کډوال هېواد ته را ولېږدول شي.
یاد کمېسیون له او آی سي، ملګرو ملتونو، اروپايي ټولنې او نورو نړیوالو بنسټونو او ادارو څخه هم غوښتنه کړې، چې د افغان کډوالو ستونزو ته ځانګړې پاملرنه وکړي، تر څو د ګاونډيو هېوادونو د چارواکو د عاجلانه او ناعادلانه پرېکړو له امله د افغان کډوالو حقوق تر پښو لاندې نشي او له هغوی سره ظلم زیاتی ونشي.
په خبرپاڼه کې زیاته شوې، چې یاد نړيوال بنسټونه بايد له کوربه هېوادونو سره د لېږد په سالمې پروسې کار وکړي؛ ترڅو هېواد ته د کډوالو راستنېده د ځانګړي میکانیزم له مخې ترسره شي.
سرچینې څرګنده کړې، چې د افغانستان اسلامي امارت د کډوالو ستونزو ته د رسېدو په برخه کې جدي اقدامات ترسره کړي او په راتلونکي کې به هم هغه امکانات چې په واک کې لري د دوی په خدمت کې مصرف او بشپړه هڅه به وکړي، چې ټول افغانان په خپل کور کې هوسا ژوند ولري.
