ا.ا پر غزې د اسرائیلو د بريدونو بيا پيل په کلکو ټکو وغندل
دید خبرې آژانس: اسلامي امارت پر غزې تړانګې د اسرائیلو د اشغالګر رژيم د بريدونو بيا پيل کېدل په کلکو ټکو وغندل.
د بهرنیو چارو وزارت د يوې خبرپاڼې په خپرولو سره ويلي چې پر غزې تړانګه د اسراییلي اشغالګر رژیم د بریدونو بیاپیل، چې په ترڅ کې یې تر دې دمه تر ۳۰۰ زیات بې ګناه فلسطینیان، چې ډېری یې مېرمنې او ماشومان دي، شهیدان او ټپیان شوي، په کلکو ټکو غندي.
په خبرپاڼه کې زياته شوې، چې د صهیونیستي يرغلګرو دغه وحشیانه عمل نه یوازې د بشري حقونو او نړیوالو قوانینو خلاف دی، بلکې د انسانیت له اساسي ارزښتونو سره هم ښکاره تضاد لري.
سرچينې زياته کړې، چې اسلامي امارت یو ځل بیا پر ذيدخله په ځانګړي ډول مؤثرو هېوادونو، غږ کوي، چې د فلسطین له مظلوم ولس څخه خپل کلک ملاتړ څرگند کړي او د اشغال د پای ته رسولو لپاره عملي او جدي اقدامات تر سره کړي.
په خبرپاڼه کې څرګنده شوې، چې د افغانستان اسلامي امارت د تل په څېر د فلسطین قضیه د اسلامي امت یوه اساسي او ګډه موضوع بولي او د هغوی حقه مبارزه او مشروع مقاومت یو ثابت حق ګڼي او ملاتړ یې کوي.
