دید خبرې آژانس: د اسلامی امارت د بهرنیو چارو وزارت له بند څخه د يوه امريکايي اسير د ازادېدو خبر ورکړی دی.
ياد وزارت د يوې خبرپاڼې په خپرولو سره ويلي چې اسلامي امارت د یوه بشردوستانه اقدام په توګه يو امریکایي اسیر جورج ګلیزمن له بند څخه ازاد کړ.
په خبرپاڼه کې زياته شوې، چې د افغانستان اسلامي امارت د تل په څېر یو ځل بیا په ډاګه کوي، چې د خبرو، تفاهم او ډیپلوماسۍ له لارې د ټولو مسایلو د حل لپاره لارې چاري پیدا کېدلای شي او د یاد امریکايي وګړي د خوشې کولو ګام هم د ښه نیت له مخې پورته شو، چې دا ښيي ټولو لوریو سره، په ځانګړې توګه د امریکا متحده ایالتونو سره، د متقابل درناوي او ګټو پر بنسټ واقعي تعامل ته چمتو دی.
سرچينې همدارنګه ويلي داچي افغانستان کي جګړه پای ته رسېدلې، د داعش په څېر فتنه ګرې ډلې ځپل شوې او له افغانستان څخه هیچا ته خطر نه دی متوجه، دا ښیې چې افغانستان د سیمې او نړۍ په ثبات کې مثبت رول لوبولای شي او هم له نړیوالو سره خپل مسایل په ښه ډول حل کولای شي.
په خبرپاڼه کې همدارنګه د عربي متحده اماراتو او قطر له دولتونو څخه مننه شوې، چې د اسلامي امارت او امریکا متحده ایالتونو ترمنځ یې د دې پرمختګ د رامنځ ته کولو په برخه کې د ښه اسانچاري او د دې قضیې په اواري کې مهم او اغېزناک رول لوبولی دی.
