دید خبرې آژانس: د امارت اسلامي د ویاند مرستیال حمدالله فطرت د روسیې د ولسمشر د وروستیو څرګندونو په غبرګون کې، چې ګواکې له افغانستانه دغه هېواد ته ګواښونه او ننګونې متوجه دي، ویلي چې د افغانستان جغرافیه د اسلامي امارت تر کنټرول لاندې ده او له افغانستانه هېڅ هېواد ته هېڅ ډول ګواښ یا خطر نشته.
ښاغلي فطرت زیاته کړې:«د افغانستان ټوله جغرافیه د اسلامي امارت د ځواکونو تر کنټرول لاندې ده او له افغانستانه هېڅ هېواد ته د تهدید او خطر احتمال نهلیدل کېږي. په دې اړه اندېښنې بېځایه دي.»
د روسیې ولسمشر ولادیمیر پوتین وايي، مسکو د افغانستان له خاورې د احتمالي ګواښونو د ننګونو په تړاو خبر دی او دغو ننګونو ته په پام سره، له تاجیکستان سره همکاریو ته دوام ورکوي.
ښاغلی پوتین د مسکو په ښار کې د روسیې او تاجیکستان ترمنځ د دوهاړخیزو هوکړهلیکونو د لاسلیکولو په مراسمو کې وویل، چې مسکو به په منځنۍ اسیا کې د سولې او ټيکاو لپاره هڅې وکړي.
د روسیې ولسمشر ولادیمیر پوتین ویلي:«البته، موږ نه شوای کولای، چې د منځنۍ اسیا د امنیتي مسایلو په تړاو خبرې ونه کړو، په ځانګړې توګه هغو ګواښونو او ننګونو ته په پام سره، چې د افغانستان له خاورې سرچینه اخلي. روسیه به د دې سیمې د سولې او ټيکاو د ساتلو لپاره خپلو هڅو ته دوام ورکړي، چې پهکې د تاجیکستان په خاوره کې د روسیې د ۲۰۱مې پوځي اډې له ظرفیتونو ګټه اخیستل هم شامل دي. موږ هوکړه وکړه، چې دفاعي، نظامي، تخنیکي، د ترهګرۍ ضد او د نشه یي توکو ضد مبارزه لا پراخه کړو.»
تر دې وړاندې د روسیې ولسمشر ولادیمیر پوتین له خپل ایراني سیال مسعود پزشکيان سره په کتنه کې هم په افغانستان کې د سولې او ټیکاو د ساتلو پر اهمیت ټینګار کړی و.
