دید خبرې آژانس: اسلامي امارت سعودي عربستان ته د افغانستان د بهرنیو چارو وزارت د سرپرست مولوي امیرخان متقي سفر د دواړو هېوادونود اړیکو د پیاوړتیا لپاره مهم ګام بللی دی.
د اسلامي امارت ویاند ذبیح الله مجاهد پرخپله اکس پاڼه یاد هېواد ته د بهرنیو چارو وزارت د سرپرست د سفر خبر ورکړی او لیکلي یې دي، چې دا سفر د دواړو هېوادونو د نيکو اړيکو د لا پياوړتيا لپاره مهم ګام دی.
مجاهد زیاته کړې، چې د سعودي عربستان د چارواکو له لوري د ښاغلي متقي تود هرکلی او عالي پروتکول د یاد هېواد د ښه نيت او ښو اړيکو څرګندونه کوي.
د یادونې وړ ده، چې د بهرنیو چارو وزارت سرپرست سعودي عربستان ته تر سفر مخکې د افغانستان لپاره د متحده عربي اماراتو له ځانګړي استازي سيف محمد الکتبي سره هم کتنه درلوده.
