ډید خبري اژانس: د روسیې د بهرنیو چارو وزیر د شانګهای د همکارۍ په سازمان کې د ایران د بشپړ غړیتوب اعلان کړی دی.
د روسیې د بهرنیو چارو وزیر سرګي لاوروف په دې وروستیو کې په مسکو کې د شانګهای د همکارۍ د سازمان د مرکز د پرانیستې په مراسمو کې وویل: د ایران بشپړ غړیتوب به د هیوادونو د مشرانو په راتلونکې غونډه کې تایید شي.
ټاکل شوې د شانګهای د همکارۍ سازمان د غړو هېوادونو د مشرانو غونډه د سرطان په ۱۳مه نېټه جوړه شي.
د ایران د بهرنیو چارو وزیر حسین امیرعبداللهیان د دغه سازمان له سرمنشي سره په ټیلیفوني خبرو کې وویل چې د ایران وروستی غړیتوب به د شانګهای د همکارۍ سازمان ته یو نوی او زیاتیدونکی ظرفیت برابر کړي.
د شانګهای د همکارۍ سازمان اوسمهال اته غړي لري (چین، قزاقستان، قرغزستان، روسیه، تاجکستان، ازبکستان، هند او پاکستان) او مرکزي دفتر یې په چین کې دی.
