دید خبرې آژانس: د اسلامي امارت جګپوړي غړي انس حقاني د امریکا له لوري د کورنیو چارو وزارت پر سرپرست خلیفه سراج الدین حقاني د اېښودل شوې جایزې د لري کولو اقدام ستایلی.
انس حقاني له الجزیرې سره خبرو کې د واشنګتن دغه ګام د امارت سیاسي لاسته راوړنه بللې ده.
انس حقاني ویلي: « د دغو بندیزونو لغوه کېدل یو اغېزناک او مهم ګام او یوه لویه لاسته راوړنه ده چې، کولی شي د افغانستان او امریکا تر منځ تړل شوې لارې پرانېزي. دا د دې ښکارندويي هم کوي چې، امریکا او د افغانستان د نوي حکومت اوسنی وضعیت درک کړی چې افغانستان امن دی او د هیڅ هېواد لپاره هیڅ ډول ګواښ نشته.»
که څه هم امریکا تر دې مهاله په رسمي توګه په دې اړه څه نه دي ویلي؛ خو د کورنیو چارو وزارت سرپرست ته نږدې سرچینو منلې چې پر سراج الدین حقاني او دوو نورو چارواکو عبدالعزیز حقاني او یحی حقاني اېښودل شوې جایزې لغوه شوې دي.
د ویلو ده چې د کورنیو چارو وزارت د سرپرست نوم د دغه هېواد د تر څار لاندې نوملړ کې و او پرې د لس میلیون ډالرو جایزه هم اېښودل شوې وه.
