دی خبري آژانس: ټاکل شوې ده چې د طا-لبانو یو پلاوی د امیرخان متقي په مشرۍ د روانې میاشتې په وروستیو کې په قطر کې له امریکايي چارواکو سره وګوري.
په ورته وخت کې چې د افغانستان په چارو کې د امریکا ځانګړي استازي ټام ویسټ او د ښځو او بشري حقونو لپاره د دغه هېواد استازې رینا امیري دوحې ته خپل سفرونه پیل کړي، د طا-لبانو د بهرنیو چارو وزارت اعلان کړی چې امیرخان متقی به راتلونکې اوونۍ قطر ته سفر وکړي.
د دغه وزارت ویاند عبدالقهار بلخي د پنجشنبې په ورځ (زمری ۵ مه) په یوه ټویټ کې لیکلي چې د امیرخان متقي په مشرۍ د دغې ډلې یو پلاوی به په دوحه کې له امریکايي او قطري چارواکو سره خبرې وکړي.
د هغه په وينا، د دې غونډې لومړيتوب د ملګرو ملتونو له تور لېست څخه د يو شمېر طا-لب چارواکو د نومونو ايستل، د بهرنيو اسعارو د زېرمو خلاصول او د افغانستان له هوايي حريم څخه د سرغړونې مخنيوى دى.
تر دې مخکې د امریکا د بهرنیو چارو وزارت اعلان کړی و چې د دغه هېواد استازي به په څو ورځو کې په دوحه کې له طا-لبانو او د هغوی د مهمو وزارتونو له کارپوهانو سره وګوري.
د امریکا د بهرنیو چارو د وزارت د ویاند مرستیال ویدانت پټېل د دغې غونډې له اعلان وروسته وویل، له طا-لبانو سره د دغه هېواد د استازو غونډه د دوی په اړه د واشنګټن په تګلاره کې د بدلون نښه نه ده.
پټېل پرون وویل چې واشنګټن له طا-لبانو سره د خپلو ګټو پر بنسټ غونډه کوي.
د امریکايي استازو او طا-لبانو ترمنځ دا غونډه په داسې حال کې کېږي چې د امریکا د استازو جرګې یوه جګپوړي غړي له کابل سره د واشنګټن پر اړیکو نیوکه کړې او ویلي یې دي چې د امریکا د حکومت له تعامل سره سره له طا-لبانو سره خپل چلند خراب شوی دی.
د امریکا د استازو جرګې د بهرنیو اړیکو د کمېټې مشر «مایکل مک کال» هم افغانستان ته د بهرنیو چارواکو پر سفرونو نیوکه وکړه او ویې ویل چې دغه سفرونه د طا-لبانو د حکومت په نورمال او مشروعیت کې مرسته کوي.
په هغه لیک کې چې هغه د امریکا د بهرنیو چارو وزیر انتوني بلینکن ته لیکلی، مک کال ویلي چې هغه د طا-لبانو تر کنټرول لاندې افغانستان ته د امریکايي چارواکو د سفر سخت مخالف دی.
د مک کال په لیک کې راغلي چې له افغانستانه د امریکا له وتلو وروسته د امریکا د حکومت هېڅ چارواکي دغه هېواد ته نه دی تللی، خو دوی هره اوونۍ په قطر کې له طا-لب استازو سره لیدنه کتنه کوي.
هغه ویلي دي چې دا اونیزې ناستې له طا-لبانو سره د خبرو لپاره د امریکا له اړتیا نه بهر دي.
هغه زیاته کړه: «دا غونډې د طا-لبانو د پیژندلو، نورمال کولو یا مشروعیت په برخه کې بدلون نه په ګوته کوي».
تر دې مخکې د امریکا د بهرنیو چارو وزارت اعلان کړی و چې د دغه هېواد استازي توماس ویسټ او رینا امیري به د جولای له ۲۶مې تر ۳۱مې قزاقستان او قطر ته سفر وکړي.
