امیرخان متقي پاکستاني پلاوي ته: د لفظي شخړې پر ځای دې د ستونزې لامل معلوم کړو
ډید خبري اژانس: د افغانستان د بهرنیو چارو وزیر امیرخان متقي له پاکستاني پلاوي سره په کتنه کې هغوی ته لارښوونه وکړه چې د لفظي شخړو او رسنیزو څرګندونو پر ځای دې د ستونزو لاملونه ومومي.
د طافلبانو د بهرنیو چارو وزارت د ویاند مرستیال حافظ ضیا احمد کابل ته د پاکستاني پلاوي د سفر په اړه یو بیان خپور کړی دی.
د طا-لبانو د بهرنیو چارو د وزارت د ویاند مرستیال ویلي دي چې دغه پلاوي د پاکستان د ستراتیژیکو مطالعاتو د انستیتیوت د مشر سهیل محمود په مشرۍ په کابل کې د دغه هیواد له سفیر عبدالرحمن نظاماني سره د افغانستان د سولې په اړه خبرې اترې کړي دي.
په دې غونډه کې د طا-لبانو د بهرنیو چارو سرپرست وزیر وویل، دا ډله ژمنه ده او ډاډ ورکوي چې د افغانستان په خاوره کې به هیچا ته زیان نه رسیږي.
هغه زیاته کړه: «موږ باید د یو بل په ښه نیت شک ونکړو او د هرې ننګونې قضیې څخه مخنیوی وکړو».
ښاغلي متقي وویل، ځینې ستونزې د دواړو هېوادونو اړیکې زیانمنوي او د «لفظي شخړې» او «رسنیو څرګندونو» پر ځای باید د دغو ستونزو پر لاملونو پوه شي.
په همدې حال کې د پاکستان د بهرنیو چارو د وزارت په اعلامیه کې دا هم ویل شوي چې د پاکستان د ستراتیژیکو مطالعاتو د انسټیټیوټ مشر په دې کتنه کې د پاکستان د امنیتي وضعیت په اړه پیښو او اندیښنو ته په اشارې سره وویل: «موږ هیله لرو چې شته ستونزې به د تفاهم له لارې هوارې شي».
دا په داسې حال کې ده، چې په دې وروستيو کې په پاکستان کې د ترهګرو بريدونو کچه لوړه شوې او دا دويم ځل دى، چې پاکستاني پلاوي کابل ته سفر کړى او له افغان طا-لبانو يې غوښتي، چې دغه بريدونه ودروي.
خو په کابل کې طا-لب چارواکي دا د پاکستان د امنیتي او استخباراتي ادارو کمزوري ګڼي او وايي چې «افغانستان هېڅ هېواد ته امنیت نشي برابرولی».
