امریکا: په افغانستان کې د داعش نوی مشر مو وژلی دی
د امريکا د دفاع وزارت وايي، چې د افغانستان لپاره د داعش ډلې نوی مشر “ابوسيد” يې وژلی دی.
د پنټاګون وياندې ډانا وايټ د يوې خبرپاڼې په خپرولو سره ادعا کړې، چې ابوسيد د تيرې سې شنبې په ورځ په کنړ کې د امريکايي ځواکونو په هوايي بريد کې وژل شوی دی.
د امريکا د سمندري ځواکونو وياند بل سالوين هم ورته څرګندونې کړي او زياته کړې يې ده، چې د داعش مشر په کنړ کې د داعش په مرکز د امريکا د بې پيلوټه الوتکې هوايي بريد کې وژل شوی دی.
شاوخوا درې مياشتې وړاندې د خراسان لپاره د داعش ډلې دوهم مشر عبدالحسيب هم د افغان او امريکايي ځواکونو په ګډو عملياتو کې وژل شوی و.
تېر کال د ننګرهار په ولايت کې د دغې ډلې لومړنی مشر حافظ سعيد ووژل شو.
تر اوسه داعش د خپل درېيم مشر د وژل کېدو په اړه رسنيو ته څه نه دي ويلي، خو تر دې وړاندې داسې راپورونه ورکول شوي و چې د عبدالحسيب تر وژل کېدو وروسته په افغانستان کې د داعش ډلې پر مشرۍ د دوو ازبک او اورکزيو ډلو تر منځ لانجې شوي چې تر اخره يې په يو مشر سره موافقه نه ده راغلې.
