دید خبرې آژانس: د امریکا بهرنیو چارو وزیر او مل پلاوی یې د سعودي پلازمېنه، ریاض کې دي.
روسیې ویلي، د بهرنیو چارو وزیر، سرګی لاوروف به نن (سې شنبه، د سلواغې ۳۰مه) د امریکا له لوړپوړو چارواکو سره خبرې وکړي، چې په کې د بهرنیو چارو وزیر، مارکو روبیو هم شامل دی.
د دغو خبرو تمرکز به د اوکراین جګړې د پای ته رسولو او د روسیې او امریکا تر منځ د اړیکو د بیا رغونې پر موضوع وي.
دغه خبرې د دوشنبې په ورځ د اروپایي مشرانو تر غونډې وروسته کېږي، چې په پاریس کې د اوکراین د جګړې لپاره د یوې متحدې سټراتیژۍ د جوړولو لپاره راټول شوي وو.
د اروپایي هېوادونو مشرانو ویلي چې دوی به په دفاعي چارو کې ډیرې پانګونې وکړي.
د امریکا د بهرنیو چارو وزیر مارکو روبیو، د سپینې ماڼۍ د ملي امنیت سلاکار مایک والټز او د منځني ختیځ استازي سټیو وټکوف به د سه شنبې په ورځ د روسیې د بهرنیو چارو وزیر سرګی لاوروف او د پوتین د بهرنیو چارو سلاکار یوري اوشاکوف سره په ریاض کې وګوري.
د روسي رسنیو راپورونو ویلي، د لاوروف او روبیو ترمنځ د شنبې پر ورځ ټلیفوني خبرې هم شوي، چې د دواړو هیوادونو ترمنځ د سوداګرۍ او پانګونې پر وړاندې د خنډونو پر لرې کولو ور ټولې وې.
اخوا اوکراین وایي، په دغو خبرو کې ګډون نه کوي او لامل یې دا دی چې دغو خبرو کې بلنه نه ده ورکړ شوې او له جزییاتو یې هم خبر نه دي.
