دید خبرې آژآنس: د بهرنیو چارو وزارت پرون کابل ته د زندانیانو په چارو کې د امریکا د ولسمشر د استازي، اډم بوایلر د سفر خبر ورکړ.
دغه پلاوي د ښاغلي بوایلر په مشرۍ او د افغان سولې لپاره د امریکا د پخواني ځانګړي استازي زلمي خلیلزاد په حضور سره کابل ته سفر وکړ.
د افغانستان د بهرنیو چارو وزارت د اعلامیې له مخې، په دغه سفر کې امریکایي پلاوي د اسلامي امارت د بهرنیو چارو وزارت سرپرست د افغانستان او امریکا د دوه اړخیزو اړیکو، د زندانیانو د ازادۍ او په امریکا کې افغانانو ته د کونسلي خدمتونو د وړاندې کولو په تړاو خبرې وکړي.
د بهرنیو چارو وزارت د عامه اړیکو مسوول، ضیا احمد تکل په دې برخه کې وايي: د بهرنیو چارو وزیر زیاته کړه چې دا مهمه ده چې افغانستان او امریکا پر دې و توانیږي چې مسئلې د خبرو له لارې هوارې کړي. متقي صاحب همدا راز و ویل، پکار ده چې دواړه هېوادونه د شل کلنې جګړې له اغېزو را ووځي او له یو بل سره سیاسي او اقتصادي مثبتې اړیکې ولري.
له دې کتنې څو ساعته وروسته، زلمي خلیلزاد پر خپله ایکس پاڼه ولیکل چې امریکایی وګړی جورج ګلېزمن له دوه نیم کاله بند وروسته د اسلامي امارت له لوري خوشې شوی دی.
د افغانستان لپاره د امریکا پخوانی ځانګړی استازی، زلمی خلیلزاد وايي: «نن ښه ورځ ده؛ موږ وتوانېدو چې یو امریکایی وګړی جورج ګلېزمن چې له دوه کلونو راهیسې په کابل کې بندي و، ازاد کړو. د طالبانو حکومت د ښه نیت په توګه د هغه له خوشې کولو سره هوکړه کړې ده.
د امریکا د بهرنیو چارو وزارت هم د هغه خوشې کېدل یو مثبت او رغنده ګام بللی دی، خو دا یې هم ویلي چې لا هم یو شمېر امریکایان په افغانستان کې بندي دي.
د اسلامي امارت د بهرنیو چارو وزارت هم د جورج ګلېزمن د خوشې کېدو پخلی کړی او ټینګار یې کړی چې نوموړی د اسلامي امارت له لوري د بشر دوستانه اقدام په توګه خوشې شوی دی. ګلېزمن د قطر په منځګړیتوب خوشې شوی دی او کابل او واشنګټن د قطر رول مهم وباله.
زلمي خلیلزاد په ۲۰۲۰ کال زېږدیز کې په دوحه کې له ملا عبدالغني برادر سره د سولې هوکړه لیک لاسلیک کړی و.
۶۵ کلن جورج ګلزمن د ډیلټا هوایي شرکت کاروونکی دی. نوموړی د ۲۰۲۲ کال په ډسمبر میاشت کې کابل ته د افغانستان له کلتور او تاریخ سره د اشنا کېدو په موخه د پنځو ورځو په مخه سفر کړی و، خو د اسلامي امارت امارت له لوري ونیول شو.
