امریکا د مادورو نیولو د لپاره جایزه ۲۵ میلیونه ډالرو ته لوړه کړه
دید خبرې آژانس: د امریکا، بریټانیا او ځینو نورو لویدیځو هېوادونو د بندیزونو او فشارونو سره سره، نیکولاس مادورو د وینزویلا د ولسمشر په توګه خپله درېیمه دوره پيل کړه.
که څه هم د وینزویلا د ټاکنو ادارې او د دغه هېواد سترې محکمې نیکولاس مادورو په ټاکنو کې د نږدې شپږو میاشتو مخالفتونو وروسته نوموړی د دغو ټاکنو ګټونکی اعلان کړ خو د رایو شمېر او جزییات نه وو شریک شوي.
د جو بایډن حکومت بیا ویلي، نیکولاس مادورو د تېر زېږیز کال ټاکنې نه دي ګټلي او امریکا به نوموړی د ولسمشر په توګه په رسمیت ونه پېژني.
بایډن د وینزویلا د ولسمشر د نیولو په تړاو د مالوماتو ترلاسه کولو لپاره ټاکل شوې ۱۵ میلیونه ډالره جایزه ۲۵ میلیونه ډالرو ته لوړه کړه.
رویټرز راپور ورکړی چې امریکا د نشه یي توکو د قاچاق په تور د نوموړي د نیولو لپاره دغه جایزه ټاکلې ده.
د راپور لمخې، د وینزویلا پوځ په جلا مراسمو کې له مادورو ملاتړ اعلان کړی دی.
